ایل جی نے دہلی حکومت کے وکلاء کے پینل کو خارج کردیا

کسانوں تحریک کے حوالے سے دہلی حکومت اور مرکزی حکومت کے مابین مستقل تنازع جاری ہے۔ دہلی کے لیفٹیننٹ گورنر انیل بیجل نے کسانوں کے احتجاج کے معاملے کی سماعت کے لئے دہلی حکومت کے تشکیل کردہ وکلاء کے پینل کو خارج کردیا ہے۔

لیفٹیننٹ گورنر کی جانب سے کہا گیا ہے کہ دہلی پولیس کی جانب سے تجویز کردہ پینل پر کابینہ کی مہر لگائی جائے، جس کے بعد دہلی حکومت نے آج کابینہ کا اجلاس طلب کیا ہے۔

آپ کو بتادیں کہ اس سے قبل وزیر داخلہ ستیندر جین نے دہلی پولیس کی جانب سے دیئے گئے مشورے پر وکلاء کے پینل کی تجویز کو خارج کردیا تھا۔ دہلی حکومت نے سرکاری وکلاء کا ایک پینل تشکیل دے کر لیفٹیننٹ گورنر کو اس تجویز کو منظوری کے لئے بھیجا تھا لیکن لیفٹیننٹ گورنر نے اس تجویز کو خارج کردیا ہے۔

اس معاملے میں لیفٹیننٹ گورنر کی کارروائی کے بعد دہلی حکومت نے جمعہ کو کابینہ کا ایک اہم اجلاس طلب کیا ہے۔

قابل غور بات یہ ہے کہ اس سے قبل اس معاملے میں دہلی کے لیفٹیننٹ گورنر اور دہلی کے وزیر داخلہ ستیندر جین کے درمیان ایک مجازی میٹنگ بھی ہوئی تھی۔ جس میں لیفٹیننٹ گورنر نے کہا تھا کہ دہلی حکومت کے مقرر کردہ وکلا اچھا کام کررہے ہیں لیکن اب لیفٹیننٹ گورنر نے پینل کو خارج کردیا ہے۔