نئی دہلی: کانگریس نے اتوار کو لکشمی برمن کو تریپورہ پردیش مہیلا کانگریس کی صدر کے طور پر تقرری کا اعلان کیا۔ کانگریس جنرل سکریٹری انچارج تنظیم کے سی وینوگوپال کی طرف سے جاری کردہ ایک ریلیز کے مطابق پارٹی کے قومی صدر ملکارجن کھڑگے نے لکشمی برمن کو تریپورہ مہیلا کانگریس کا سربراہ مقرر کرنے کی تجویز کو فوری اثرات سے منظوری دے دی ہے۔ لکشمی برمن کی تقرری شمال مشرقی ریاست میں ہونے والے اسمبلی انتخابات سے پہلے کی گئی ہے۔ تریپورہ کی 60 اسمبلی سیٹوں کے لیے پولنگ 16 فروری کو ہوگی اور ووٹوں کی گنتی 2 مارچ کو ہوگی۔
واضح رہے کہ الیکشن کمیشن نے 16 فروری کو ہونے والے تریپورہ کی 13ویں قانون ساز اسمبلی کے انتخابات کے لیے 21 جنوری کو باضابطہ نوٹیفکیشن جاری کر دیا، جس کے ساتھ ہی نامزدگی کا عمل شروع ہو گیا ہے، جو 30 جنوری تک جاری رہے گا۔ نوٹیفکیشن کے مطابق کاغذات نامزدگی کی جانچ پڑتال 31 جنوری کو ہوگی اور کاغذات نامزدگی واپس لینے کی آخری تاریخ 2 فروری ہوگی۔ چیف الیکٹورل آفیسر کرن گٹے نے کہا کہ تریپورہ میں ووٹوں کی گنتی 2 مارچ کو ہوگی۔ تریپورہ کی حتمی ووٹر لسٹ میں 28,13,478 ووٹر ہیں، جن میں سے 14,14,576 مرد، 13,98,825 خواتین اور 77 ٹرانس جینڈر ووٹر ہیں، 10,344 سروس ووٹر ہیں۔ انہوں نے بتایا کہ 80 سال سے زیادہ عمر کے 38,039 ووٹرز اور 100 سال سے زیادہ عمر کے 679 ووٹرز ہیں۔ انہوں نے کہا کہ 18-19 سال کی عمر کے 65,044 ووٹرز رجسٹرڈ ہیں جن میں 34,704 مرد، 30,328 خواتین اور 12 خواجہ سرا ہیں۔