دارالحکومت دہلی میں جمعیۃ علماء ہند نے ان لوگوں کی مدد کی ہے جن لوگوں نے دہلی فسادات میں اپنا سب کچھ کھو دیا ہے انہیں تین مرحلوں میں 107 چھوٹے تاجروں کے درمیان 25 لاکھ 68 ہزار بذریعہ چیک تقسیم کیے گئے ہیں۔
مستفیدین میں جنرل اسٹور، سیلون، سبزی دکان، سلائی سینٹرس، الیکٹرانک شاپ، فرنیچر شاپ، لیڈیز پرس، چکن شاپ سمیت درجنوں تجارت سے جڑے لوگ ہیں جن کی دکانیں دہلی فسادات میں جلا دی گئی تھی۔
جمعیۃ کی اس مہم میں مجیدیہ ہسپتال، جامعہ ہمدرد کے ڈاکٹر صاحبان نے بھی اپنی طرف سے تعاون پیش کیا ہے۔
جمعیۃ کے جنرل سکریٹری مولانا محمود مدنی نے کہا کہ جمعیۃ علماء فساد متاثرین کے حقیقی مسائل کو حل کرنے کی کوشش کررہی ہے۔
دہلی فساد متاثرین کے گھروں کی تعمیر کے علاوہ ان کی معاشی بازآبادکاری پر بھی کام ہورہا ہے، لاک ڈاؤن میں ان تک راشن کٹ اور تازہ سبزیاں پہنچائی جارہی ہیں۔
واضح رہے کہ جمعیۃ علماء کی روایت رہی ہے کہ متاثرین کی عارضی امداد کے علاوہ ان کی اصل پریشانیوں کا بھی تدارک کیا جائے۔ ضرورت مندوں کو جب تیسرے مرحلے میں چیک دیے گیے تو اس درمیان جمعیۃ علماء ہند کے سکریٹری اور شو وہار کے مقام ذمہ داران بھی موجود رہے۔