دہلی فسادات: خاک ہوئی ٹائر مارکیٹ کی تعمیر جمعیت نے مکمل کی

گذشتہ فروری میں ہوئے فرقہ وارانہ فسادات میں گوکل پوری کی ٹائر مارکیٹ کو فسادیوں نے جلا کر راکھ کر دیا تھا، جس کے بعد جمعیت علمائے ہند نے تمام دکانوں کو پھر سے تعمیر کرایا ہے۔

دارالحکومت دہلی کے شمال مشرقی دہلی میں ہوئے فرقہ وارانہ فسادات میں گوکل پوری کی ٹائر مارکیٹ کو فسادیوں نے جلا کر راکھ کر دیا تھا، جس کے بعد جمعیت علمائے ہند نے تمام دکانوں کو پھر سے تعمیر کرانے کا بیڑا اٹھایا تھا، جسے آج مکمّل کر دیا ہے۔

ای ٹی وی بھارت کے نمائندے نے جمعیت علمائے ہند کے سیکریٹری نیاز احمد فاروقی سے بات چیت کی، جس میں انہوں نے بتایا کہ، 'فسادات کے دوران پوری مارکیٹ کو نذرآتش کر دیا گیا تھا اور جو معاوضہ کا اعلان حکومت کی جانب کیا گیا تھا وہ بھی انہیں نہیں مل پایا ہے۔

ایسے میں جمعیت علمائے ہند کے جنرل سیکریٹری مولانا محمود مدنی نے اس مارکیٹ کی تعمیر کا ذمہ اٹھایا تھا اور تقریباً 97 دوکانوں میں تعمیراتی کام کیا گیا ہے۔'

نیاز احمد فاروقی نے مزید کہا کہ، 'ہم نے نہ صرف تعمیراتی کام کیے ہیں بلکہ مالی تعاون بھی کیا گیا ہے تاکہ دکاندار اپنے کاروبار کو شروع کر سکیں۔'

جمعیت کے سیکریٹری نیاز احمد فاروقی نے بتایا کہ، 'اب تک فساد زدہ علاقوں میں جمیعت کی جانب سے 5 مساجد کے ساتھ ساتھ درجنوں گھر اور دکانیں تعمیر کی جا چکی ہے۔'