جامعہ ملیہ اسلامیہ کوآرڈنیشن کمیٹی نے بیان جاری کر کے کہا کہ 'ہم کوئی سیاسی جماعت نہیں ہیں لیکن پھر بھی انتخابات جمہوریت کا سب سے اہم عمل ہے، اس کے احترام میں مظاہرہ کو گیٹ نمبر 7 سے ہٹا دیا جائے گا اور سڑکیں کھول دی جائیں گی، بیان کے مطابق یہ منتقلی دو روز کے لیے ہوگی، 8 کو ووٹنگ کے بعد 9 فروری سے دوبارہ سے اسی مقام پر مظاہرے شروع ہو جائیں گے۔
فی الحال گیٹ نمبر 4 پر مظاہرہ ہوگا اور اس میں کسی بھی طرح کے اسپیکر یا مائیک کا استعمال نہیں ہوگا۔
جامعہ کے مظاہرین کا یہ اعلان ایسے وقت میں آیا ہے جب خود دہلی پولیس نے انتخابات کے مد نظر مظاہرین کو ہٹانے کے لیے جامعہ یونیورسٹی انتظامیہ کو ہدایت دی۔
واضح رہے کہ دہلی پولیس نے 4 فروری کو جامعہ کے رجسٹرار کو مکتوب کے ذریعےگزارش کی تھی کہ دہلی اسمبلی انتخابات کے پیش نظر یونیورسٹی کے گیٹ نمبر 7 پر ہونے والے دھرنے کو ہٹایا جائے۔
پولیس کے مکتوب کی روشنی میں جامعہ ملیہ اسلامیہ انتظامیہ نے 5 فروری کو مظاہرے کے منتظمین سے کہا کہ تمام پارٹیوں کے مفادات کے پیش نظر دہلی پولیس کی گزارش پر عمل کرنا بہتر ہوگا۔ اور اسی کے تحت طلباء نے مظاہرے کی جگہ تبدیل کرنے کا فیصلہ کیا ہے۔