جماعت اسلامی ہند کا وزیراعظم مودی کو خط، مدد کی پیشکش

جماعت اسلامی ہند کے سربراہ سید سعادت اللہ حسینی نے ملک بھر میں کورونا وائرس کے خلاف اس لڑائی میں جماعت اسلامی ہند کے ذریعے مدد کی یقین دہانی کرائی ہے۔

ملک گیر سطح پر کورونا کی بگڑتی صورتحال کے درمیان جماعت اسلامی ہند کی جانب سے وزیر اعظم نریندر مودی کو خط لکھا گیا جس میں کورونا وائرس سے پیدا شدہ بحران پر تشویش کا اظہار کیا گیا ہے۔ وہیں دوسری جانب مرکزی وہ ریاستی سطح پر حکومت کی جانب سے ہوئی لاپروائی کی جانب بھی توجہ دلائی گئی ہے۔

جماعت اسلامی کا مودی کو خط

جماعت اسلامی ہند کے نائب صدر انجینیئر محمد سلیم نے بتایا کہ وزیر اعظم کو لکھے خط میں ملک کی موجودہ صورتحال میں کورونا کی اس لڑائی میں جو ضروری میڈیکل سہولیات ہیں ان کی کمی کو پورا کرتے ہوئے اس جنگ کو جیتنے کے لیے تمام تر اقدامات کیے جائیں۔

خط میں یہ بھی لکھا ہوا ہے کہ کووڈ کے ماحول میں جو آفت ہمارے اوپر مسلط ہوئی ہے اس کا ایک پہلو اخلاقی بگاڑ اور سماج میں ظلم اور نا انصافیوں کا حد سے آگے بڑھ جانا بھی ہے۔

انجینیئر محمد سلیم نے مزید کہا کہ یہ مہلک وبا کافی خطرناک ہے۔ ایسے میں حکومت کو چاہیے کہ وہ سماجی تنظیموں کا سہارا لے اور اس کے لیے جماعت اسلامی ہند پوری طرح سے تیار ہے۔