یوم جمہوریہ کے موقع پر لال قلعے سمیت مختلف مقامات پر ہونے والے تشدد کے تعلق سے پولیس کی کارروائی تیز ہوگئی ہے۔ پولس نے ایک کے بعد ایک ملزمین کو گرفتار کرنے میں کامیابی حاصل کی۔
دہلی پولیس کے خصوصی سیل نے لال قلعہ پر تشدد کے معاملے میں مفرور ملزم اقبال سنگھ کو پنجاب سے گرفتار کرلیا ہے۔
اس کی گرفتاری پر دہلی پولیس نے 50 ہزار روپے انعام کا اعلان کیا تھا۔
ڈی سی پی سنجیو یادو کے مطابق اقبال سنگھ لال قلعے میں اس وقت موجود تھا جب تشدد کا واقعہ پیش آیا تھا۔
لیکن اس تشدد کے بعد وہ فرار ہوگیاتھا۔ اس واقعے کے بعد اس کی تلاش جاری تھی اور دہلی پولیس نے اس کی گرفتاری پر 50000 روپے انعام کا اعلان بھی کیا تھا۔ حال ہی میں اسپیشل سیل کو یہ اطلاع ملی کہ وہ پنجاب کے ہوشیار پور میں موجود ہے۔ اس اطلاع پر سیل کی خصوصی ٹیم نے چھاپہ مارا اور اسے گرفتار کرلیا۔
اسے دہلی لایا گیا ہے جہاں اس سے مزید پوچھ گچھ ہوگی۔
ملزم کو کرائم برانچ کے حوالے کیا جائے گا دہلی پولیس ملزم کو عدالت کے روبرو پیش کرے گی جہاں سے اسے کرائم برانچ کے حوالے کیا جائے گا۔
لال قلعہ تشدد کیس کی تحقیقات دہلی پولیس کی کرائم برانچ کررہی ہے اور دیپ سدھو سمیت دیگر ملزمان کی بھی خود کرائم برانچ جانچ کر رہی ہے۔
خیال رہے کہ دیپ سدھو کو کل ہی دہلی پولیس نے گرفتار کیا ہے۔ سدھو کو ہی اس واقعہ کا کلیدی ملزم کہا جا رہا ہے۔ دہلی پولیس کی اسپیشل سیل اس معاملے کی جانچ کر رہی ہے۔