بھارت نے پاکستانی فضائی حدود کے مسئلے کو آئی سی اے او میں اٹھایا

بھارت نے سعودی عرب کے دورے کے لیے وزیراعظم نریندر مودی کے طیارے کو پاکستان کی فضائی حدود استعمال کرنے کی درخواست مسترد کر دیے جانے کے بعد اس مسئلے کو بین الاقوامی شہری ہوابازی کی تنظیم (آئی سی اے او) میں اٹھایا ہے۔

ذرائع کے مطابق آئی سی اے او کے ذریعہ طے شدہ ہدایات کے مطابق دیگر ملکوں کے ذریعہ اوورفلائٹ کلیئرنس کی درخواست کی جاتی ہے اور انھیں اسکی منظوری دی جاتی ہے ۔

ذرائع نے کہا کہ بھارت اوور فلائٹ کلیئرنس کا اپنا مطالبہ جاری رکھے گا ۔ہم نے الگ سے بھی اس مسئلہ کو اٹھاتے ہوئے دیگر بین الاقوامی شہری ہوابازی کے اداروں کے سامنے رکھا ہے۔ پاکستان کو فضائی حدود کے استعمال کی بین الاقوامی روایت کو نہ ماننے کے اپنے فیصلہ پر غورکرنا چاہئے اور کوئی بھی یکطرفہ فیصلہ کرنے کے لیے جھوٹے بیان کا سہارا لینے کی اپنی پرانی عادت کے بارے میں بھی سوچنا چاہیے ۔'

پاکستانی میڈیا میں خبروں کے مطابق پاکستان کے وزیر خارجہ شاہ محمود قریشی نے اتوار کو کہا کہ پاکستان نے بھارت کی وہ درخواست نامنظور کردی ہے جس میں ہندوستانی وزیراعظم کی سعودی عرب دورے کے لیے ان کے طیارے کو پاکستانی فضائی حدود سے گزرنے کی اجازت دینے کی درخواست کی تھی ۔

وزارت خارجہ کی طرف سے جاری بیان میں کہا گیا تھا کہ یہ فیصلہ جموں کشمیر میں بھارتی سلامتی دستوں کے ذریعہ حقوق انسانی کی خلاف ورزیوں اور پاکستان کے یوم سیاہ منانے کے تئیں یکجہتی کی وجہ سے کیا گیا ہے۔