دہلی میں محنت کشوں کے لیے کم از کم مزدوری میں اضافہ

کیجریوال حکومت نے دہلی کے تعمیراتی کام میں لگے مزدوروں کو سرکاری اسکیموں کا فائدہ پہنچانے کے لیے ’شرمک مترا ‘اسکیم شروع کی ہے۔ اس اسکیم کے تحت 800 ’شرمک دوست‘ ان مزدوروں کے گھر پہنچیں گے، انہیں سرکاری اسکیموں سے جوڑیں گے اور دہلی حکومت کی طرف سے مزدوروں کے مفاد میں شروع کی گئی اسکیموں کے بارے میں جانکاری دیں گے۔

دہلی حکومت نے غریبوں اور محنت کش طبقے کے مفادات کو دھیان میں رکھتے ہوئے دہلی میں کم از کم اجرت میں اضافہ کیا ہے۔ نئے اضافے کا اطلاق یکم اکتوبر 2021 سے ہوگا۔ اس کے تحت کسی بھی غیر ہنرمند مزدور کو 15,908 کے بجائے 16064 اور نیم ہنرمند مزدور کو کم از کم 17,693 روپے ملیں گے۔ ہنر مندوں کی تنخواہ میں بھی اضافہ کیا گیا ہے جو اب 19,473 روپے ہوجائے گی۔
دہلی میں مزدوروں کو دی جانے والی کم از کم اجرت ملک کی کسی بھی دوسری ریاست کے مقابلے میں سب سے زیادہ ہے۔ یہ ایک سال میں دوسری بار ہے جب دہلی حکومت نے صحت کے بحران کے درمیان کارکنوں کے لیے مہنگائی بھتہ بڑھایا ہے۔
حکومت کی جانب سے دی گئی معلومات کے مطابق سپروائزر اور کلریکل ملازمین کی کم از کم اجرت کی شرح میں بھی اضافہ کیا گیا ہے۔ ان میں نان میٹرک ملازمین کی ماہانہ تنخواہ 17,537 روپے سے بڑھا کر 17693 روپے کر دی گئی ہے، لیکن نان گریجویٹ ملازمین کی ماہانہ تنخواہ 19,291 روپے سے بڑھاکر 19473 روپے کردی گئی ہے اور گریجویٹ اور اس سے اوپر کے تعلیم یافتہ ملازمین کی ماہانہ تنخواہ اہلیت 20,976 روپے سے بڑھاکر 21,184 روپے کردی گئی ہے۔
نائب وزیر اعلیٰ منیش سسودیا نے کہا کہ غریبوں اور محنت کش طبقے کے مفادات کو مدنظر رکھتے ہوئے کورونا وبا کے دوران یہ بڑا قدم اٹھایا گیا ہے۔ کلریکل اور سپروائزر طبقے کے ملازمین کو بھی اس کا فائدہ ملے گا۔ انہوں نے کہا کہ غیر منظم شعبے کے ایسے کارکنان کو مہنگائی الاؤنس نہیں روکا جاسکتا، جنہیں عام طور پر صرف کم از کم اجرت ملتی ہے، اس لیے دہلی حکومت نے مہنگائی الاؤنس کو شامل کرکے نئی کم از کم اجرت کا اعلان کیا ہے۔
نائب وزیر اعلیٰ سسودیا نے کہا کہ آج ملک میں مہنگائی اور اشیاء کی آسمان چھوتی قیمتوں کی وجہ سے سماج کا ہر طبقہ مالی طور پر بھی متاثر ہوا ہے۔ اناج، دالیں اور تیل جیسی روزمرہ استعمال کی اشیاء بھی مہنگی ہوگئی ہیں۔ مجھے امید ہے کہ اس اضافے سے مزدوروں کو مدد ملے گی۔

دوسری طرف کیجریوال حکومت نے دہلی کے تعمیراتی کام میں لگے مزدوروں کو سرکاری اسکیموں کا فائدہ پہنچانے کے لیے ’شرمک مترا ‘اسکیم شروع کی ہے۔ اس اسکیم کے تحت 800 ’شرمک دوست‘ ان مزدوروں کے گھر پہنچیں گے، انہیں سرکاری اسکیموں سے جوڑیں گے اور دہلی حکومت کی طرف سے مزدوروں کے مفاد میں شروع کی گئی اسکیموں کے بارے میں جانکاری دیں گے۔ یہ اس بات کو یقینی بنائے گا کہ کوئی بھی کارکن حکومت کی طرف سے فراہم کی جانے والی کسی بھی امداد سے محروم نہیں رہے گا۔