دہلی وقف بورڈ میں دارالافتاء کے قیام پر ملا جلا رد عمل

اگر دار الافتاء حکومت کے زیر انتظام آجاتا ہے تو حکومت اسے اپنے حساب سے استعمال کرے گی اور الیکشن کے دوران بھی اس کا استعمال کر سکتی ہے۔ مذکورہ باتیں مفتی اعجاز قاسمی نے کہی۔

دہلی وقف بورڈ کے زیر انتظام قائم کیا گیا دارالافتاء پر جہاں ایک طرف تعریفیں ہو رہی ہیں وہیں دوسری طرف اس کی مخالفت بھی دیکھنے کو مل رہی ہے۔

دراصل دہلی وقف بورڈ کے سابق رکن مفتی اعجاز قاسمی نے دہلی وقف بورڈ کے زیر انتظام قائم ہونے والے دار الافتاء پر اعتراض ظاہر کیا ہے۔ ان کا کہنا ہے کہ اس سے مفتیان کرام اور فتویٰ وقف بورڈ کے زیر انتظام آتا ہے تو وہ دہلی حکومت کے اثر سے بچ نہیں پائے گا۔

انہوں نے مزید کہا کہ اگر دار الافتاء حکومت کے زیر انتظام آجاتا ہے تو حکومت اسے اپنے حساب سے استعمال کرے گی اور الیکشن کے دوران بھی اس کا استعمال کر سکتی ہے۔

حالانکہ دہلی اقلیتی کمیشن کے ایڈوائزری ممبر مسرور صدیقی کا کہنا ہے کہ دہلی وقف بورڈ کے زیر انتظام دار الافتاء کے قیام میں کوئی برائی نہیں ہے، بلکہ اس سے عوام کو آسانی ہوگی۔

قابل ذکر ہے کہ دہلی وقف بورڈ کے چیئرمین امانت اللہ خان نے دار الافتاء کے قیام کا فیصلہ کیا ہے، اس سے پہلے کسی بھی ریاست کی وقف کمیٹی میں اس طرح کی پہل نہیں کی گئی۔

دہلی وقف بورڈ میں دار الافتاء کی قیادت مفتی ذکاوت حسین کا قاسمی کے سپرد کی گئی ہے وہ دہلی کے مدرسہ امینیہ میں حدیث اور افتاء کی خدمت گذشتہ کئی برسوں سے کرتے آ رہے ہیں۔