اپنا بیٹا مانتے ہو تو ووٹ دو: کیجریوال

دہلی کے وزیر اعلیٰ اروند کیجریوال نے کہا کہ 'اگر دہلی کے لوگ انہیں اپنا بیٹا مانتے ہیں تو ووٹ دیں اور اگر انہیں دہشت گرد مانتے ہیں تو بی جے پی کو ووٹ دیں۔'

عام آدمی پارٹی کے قومی کنوینر اور دہلی کے وزیر اعلی اروند کیجریوال نے لکشمی نگر، رٹھالہ، وشواس نگر اسمبلی حلقوں میں جلسہ عام سے خطاب کرتے ہوئے کہا کہ 'انہوں نے ملک کے لئے اپنا سب کچھ قربان کر دیا لیکن بی جے پی والے انہیں دہشت گرد کہہ رہے ہیں'۔

انہوں نے کہا کہ 'اگر دہلی کے لوگ انہیں اپنا بیٹا مانتے ہیں تو انہیں ووٹ دیں اور اگر انہیں وہ دہشت گرد لگتے ہیں تو وہ بی جے پی کو ووٹ دیں'۔

ان کا کہنا تھا کہ 'دہلی میں رہ رہے بیشتر کرایہ داروں کو عدم معلومات کے سبب 200 یونٹ مفت بجلی کا فائدہ نہیں مل رہا ہے جبکہ وہ بھی وزیر اعلی كرایہ دار بجلی میٹر منصوبہ کے تحت اپنا میٹر لگوا سکتے ہیں۔ اس کے لئے اب انہیں مالک مکان سے نو آبجیکشن سرٹیفکیٹ (این او سی) لینے کی ضرورت نہیں ہے'۔

کیجریوال نے مزید کہا کہ 'ہماری حکومت نے پانچ سال بہت سارے کام کئے۔ اسکول، ہسپتال، بجلی، پانی، سی سی ٹی وی کیمرے، خواتین کے لئے بسوں میں سفر مفت کیا'۔

انہوں نے کہا کہ 'میں نے دہلی کی عوام کا بیٹا بن کر تمام ذمہ داریوں کو ادا کرنے کی کوشش کی ہے'۔

انہوں نے کہا کہ 'گزشتہ 70 برسوں میں پورے ملک میں کسی بھی ریاست میں ایسی حکومت نہیں آئی جس نے غریبوں کے لیے سرکاری اسکول اچھے کیے ہوں۔ دہلی کے سرکاری اسکولوں میں 16 لاکھ بچے پڑھتے ہیں۔ اس بار دہلی میں پہلی ایسی حکومت آئی ہے، جس نے سرکاری اسکولوں کو اچھا کیا ہے۔ تمام سرکاری ہسپتالوں اور محلہ کلینک میں تمام ادویات مفت کر دی گئی ہیں اور تمام ٹیسٹ مفت کر دیے گئے ہیں'۔