بیڈ بوائے بلینیرس سے متعلق میہول چوکسی کی درخواست پر سماعت

دہلی ہائی کورٹ کی ڈویژنل بنچ آج پی این بی گھوٹالہ کیس کے ملزم میہول چوکسی کی درخواست پر سماعت کرے گی۔ بتا دیں کہ چوکسی نے ایک درخواست دائر کی ہے جس میں انہوں نے ویب سیریز بیڈ بوائے بلینیرس کا پرومو دیکھنے کا مطالبہ کیا ہے۔

دہلی ہائی کورٹ کی ڈویژن بنچ آج پنجاب نیشنل بینک (پی این بی) گھوٹالہ کیس کے ملزم اور ہیرے کے مفرور تاجر میہول چوکسی کی درخواست پر سماعت کرے گی۔ آپ کو بتادیں کہ میہول چوکسی نے ایک درخواست دائر کی ہے جس میں نیٹ فلکس پر آنے والی ویب سیریز بیڈ بوائے بلینیرس کا پرومو دیکھنے کا مطالبہ کیا گیا ہے۔ چیف جسٹس ڈی این پٹیل کی سربراہی میں بنچ اس درخواست کی سماعت کرے گی۔ اس سے قبل ہائی کورٹ کے سنگل بنچ میہول چوکسی کی درخواست خارج کر چکی ہے۔

غور طلب ہے کہ 28 اگست کو ہائی کورٹ نے میہول چوکسی کی درخواست خارج کردی تھی۔ جسٹس نوین چاؤلہ کے بنچ نے کہا کہ اس معاملے میں دیوانی مقدمہ دائر کیا جانا چاہئے کیونکہ اس میں نجی حقوق کی پامالی کا مقدمہ شامل ہے۔ سنگل بینچ نے بھی ویب سیریز کے پرومو کو دیکھنے کی اجازت نہیں دی۔

سنگل بنچ نے کہا تھا کہ او ٹی ٹی پلیٹ فارم کے مشمولات کو ریگولیٹ کرنے کے لئے کوئی قانون موجود نہیں ہے۔ سنگل بنچ نے ایسی ہی ایک درخواست پر ہائی کورٹ کے ڈویژن بینچ کے فیصلے کا حوالہ دیا تھا۔ سماعت کے دوران وکیل وجے اگروال نے میہول چوکسی کی جانب سے عدالت کو بتایا کہ وہ اس ویب سیریز پر پابندی کے خواہاں نہیں ہیں بلکہ اس کا پرومو دیکھنا چاہتے ہیں۔

نیٹ فلکس کی جانب سے سینئر ایڈوکیٹ نیرج کِشن کول نے کہا تھا کہ ویب سیریز میں ایک دو منٹ کی کلپ ہے جس میں میہول چوکسی کا ذکر ہے۔

انہوں نے کہا کہ او ٹی ٹی پلیٹ فارم کے مشمولات کا کوئی ضابطہ نہیں ہے۔ نیٹ فلیکس نے جاری کردہ ویب سیریز بیڈ بوائے بلینیرس کے پوسٹر میں میہول چوکسی کے بھتیجے نیرو مودی ، سہارا گروپ کے سربراہ سبرت رائے ، وجئے مالیا ، اور ستیم کمپیوٹر کے راملنگا راجو دکھائے گئے ہیں۔

نیٹ فلکس نے اس ویب سیریز کے بارے میں کہا ہے کہ یہ ایک تحقیقاتی ویب سیریز ہے جو بھارت کی بدنام زمانہ مشہور شخصیات کی لالچ ، جعلسازی اور بدعنوانی کو بے نقاب کرتی ہے۔ یہ ویب سیریز 2 ستمبر کو ریلیز کی جائے گی۔

واضح رہے کہ میہول چوکسی گیتانجلی جواہرات کے پروموٹر ہیں۔ میہول چوکسی اور نیرو مودی پر پی این بی کے ساتھ 13،500کروڑ روپے کے قرض کی دھوکہ دہی کا الزام ہے۔ میہول چوکسی، نیرو مودی اور ان کی اہلیہ امی مودی ہندوستان چھوڑ کر فرار ہوگئے ہیں۔ ای ڈی نے سازش اور منی لانڈرنگ کے الزام میں چوکسی ، امی مودی اور نیرو مودی کے خلاف مقدمہ درج کیا ہے۔