دارالحکومت دہلی کے حکیم اجمل خان گرلز سینئر سیکنڈری اسکول کی تاریخ میں پہلی مرتبہ دسویں جماعت میں 100 فیصد نتائج سامنے آئے ہیں۔
رواں برس دسویں کے امتحانات میں 33 بچیوں نے شرکت کی تھی، جس میں سے تمام بچیوں نے امتحانات میں کامیابی حاصل کی ہے۔
گزشتہ برس حکیم اجمل خان گرلز سینئر سیکنڈری اسکول کے دسویں جماعت کے نتائج 35 فیصد ہی تھے تاہم رواں برس 65 فیصد کا اضافہ کرتے ہوئے اسکول نے ایک نئی تاریخ لکھی ہے۔
قابل ذکر ہے حکیم اجمل خان گرلز سینئر سیکنڈری اسکول سنہ 1974 میں قائم کیا گیا تھا، جبکہ آج اس اسکول کو تقریباً 46 برس کا عرصہ گزر گیا ہے۔
اسکول کی پرنسپل ڈاکٹر شبنم نے میڈیا سے گفتگو کرتے ہوئے بتایا کہ، 'نہ صرف اس بار اسکول کی طالبات نے کامیابی حاصل کی بلکہ دسٹکنشنز میں بھی اضافہ ہوا ہے۔'
حکیم اجمل خان اسکول میں ٹاپ کرنے والی لائبہ مشاہد نے 84 فیصد نمبر حاصل کیے ہیں جبکہ دوسرے مقام پر قبضہ جمانے والی افشاں فیصل نے 81 فیصد نمبر حاصل کیے وہیں عرفہ نے 78 فیصد نمبروں کے ساتھ دسویں جماعت کے سی بی ایس ای بورڈ کے امتحانات میں کامیابی حاصل کی ہے۔
