'سرکاری اشتہارات پر دو برس تک کے لیے پابندی لگے'

کانگریس کی صدر سونیا گاندھی نے کورونا وباء سے لڑنے کے لیے اراکین پارلیمان کی تنخؤاہ 30 فیصد کم کرنے کے حکومت کے فیصلے کی حمایت کرتے ہوئے کہا کہ اس وباء کے خلاف جنگ میں بہت پیسے کی ضرورت ہوگی۔ اس لیے سرکاری اشتہارات اور اخراجات میں کمی کرکے بیرون ملک کے دوروں پر روک لگانے کی سخت ضرورت ہے۔

محترمہ سونیا گاندھی نے وزیر اعظم نریندر مودی کو اس سلسلے میں ایک خط لکھا جس میں حکومت سے لگزری پروجیکٹوں کو روک کر اس فنڈ کا استعمال کورونا سے لڑنے کے لیے کرنے اور وزیر اعظم کیئر فنڈ کی رقم کو وزیر اعظم قومی ریلیف فنڈ میں منتقل کرنے کی درخواست کی ہے۔

انہوں نے کہا کہ سب سے پہلے حکومت کو ٹیلی ویزن، پرنٹ اور آن لائن اشتہارات پر دو برس کے لیے روک لگا کر یہ پیسہ کورونا وائرس سے پیدا شدہ بحران سے لڑنے میں لگانا چاہئے۔

انہوں نے واضح کیا کہ کووڈ۔19 سے متعلق صلاح یا صحت سے متعلق اشتہارات کو اس روک سے باہر رکھا جانا چاہئے۔

ان کا کہنا تھا کہ مرکزی حکومت اشتہار پر ہر برس تقریبا 1,250 کروڑ روپے خرچ کرتی ہے اور اس پر روک سے کورونا سے معیشت اور سماج کو ہونے والے نقصان کی بھرپائی کرنے میں بڑی مدد مل سکتی ہے۔

کانگریس کی صدر نے کورونا کے پیش نظر 20,000 کروڑ روپے کی لاگت سے بن رہے 'سینٹرل وسٹا' بیوٹی فکیشن ایند کنسٹرکشن پروجیکٹ کو ملتوی کرنے کی بھی مانگ کرتے ہوئے کہا کہ موجودہ حالت میں لگزری پر کیا جانے والا خرچ ضائع کے مترادف ہے۔