دہلی ایمس میں آتشزدگی، بڑی مشقت کے بعد قابو پایا گیا

دہلی کے ایمس اسپتال کے کنورژن بلاک کی 9 ویں منزل پر رات 10.30 بجے کے قریب آگ لگ گئی جس پر اب قابو پا لیا گیا ہے۔ معلومات کے مطابق کنورژن بلاک کی 9 ویں منزل پر آگ لگی تھی۔ یہاں پر کوئی مریض نہیں ہوتے ہیں۔ اس منزل میں لیب اور دیگر آفس ہوتے ہیں۔

فائر بریگیڈ کی ٹیم کو آگ پر قابو پانے میں تقریباً ڈیڑھ گھنٹے کا وقت لگا۔ ایمس انتظامیہ کے مطابق آگ لگنے کی وجہ سے کوئی جانی نقصان نہیں ہوا ہے۔

ایمس کی نویں منزل پر آگ کی لپٹیں دیکھنے کو ملتی تھیں جس کے بعد محکمہ فائر بریگیڈ کی جانب سے 20 گاڑیاں موقع پر پہنچی اور تقریباً 1.5 گھنٹے میں آگ پر قابو پا لیا۔

دہلی ایمس کے مطابق آگ لگنے کی جگہ پر ایک ڈائیگنوسٹک لیب موجود تھی۔ لیب میں کام کرنے والے طبی اہلکار کو وقت رہتے نکال لیا گیا، جس کے چلتے کوئی جانی نقصان نہیں ہوا۔

اس سے قبل دہلی ایمس میں 17 اگست 2019 کے دوران بھی آتشزدگی کا واقعہ پیش آیا تھا۔ اس واقعہ کے نشانات ابھی بھی ایمس کے اکیڈمک بلاک میں نظر آتے ہیں جس میں کروڑوں روپے کی ماڈرن لیب جل گئی تھیں۔

اس سے قبل سنہ 2016 میں ایسے واقعات پیش آئے تھے۔ سنہ 2016 سے لیے کر تین اپریل 2019 کے درمیان ایمس انتظامیہ نے چار بار ایڈوائزری جاری کرتے ہوئے محکمہ کو احتیاط برتنے کی ہدایت دی تھی لیکن حالات پھر بھی نہیں بدلے۔