دہلی: مسلم دکاندار کو دھمکی دینے والے کے خلاف ایف آئی آر درج

جب یہ ویڈیو سوشل میڈیا پر وائرل ہوئی تو عام آدمی پارٹی کے اقلیتی ونگ کے سیکرٹری انور شاہد نے براڑی پولیس سے اس کی شکایت کی اور ایف آئی آر درج کرائی۔

قومی دارالحکومت دہلی کے شمالی علاقے براڑی کے سنت نگر میں دیوالی کے دن بریانی کی دکان چلانے والے ایک مسلمان دکاندار کو دھمکی دے کر جبراً دکان بند کرنے کو کہا گیا تھا جب اس کی ویڈیو منظر عام پر آئی تو عوام میں شدید غصہ دیکھا گیا اور سوشل میڈیا پر بھی شدید مذمت کی گئی۔

ویڈیو میں دھمکی دینے والا شخص اپنا نام نریش کمار سوریاونشی بتاتا ہے اور خود کو سخت گیر ہندو تنظیم بجرنگ دل کا رکن ظاہر کرتا ہے۔ ویڈیو میں دکاندار کو دیوالی پر دکان کھولنے پر ہراساں کرتا ہوا سنا جاسکتا ہے۔

ویڈیو میں وہ شخص دھمکی دے رہا ہے کہ یہ ہندوؤں کا علاقہ ہے جامع مسجد نہیں، کس نے تمہیں یہاں دکان کھولنے کی اجازت دی ہے اس کے ساتھ وہ یہ بھی کہہ رہا ہے کہ ہندوؤں جاگ جاؤ یہ لوگ جہاد کرتے ہیں۔

جب یہ ویڈیو سوشل میڈیا پر وائرل ہوئی تو عام آدمی پارٹی کے اقلیتی ونگ کے سیکرٹری انور شاہد نے براڑی پولیس سے اس کی شکایت کی اور ایف آئی آر درج کرائی۔

اس پورے معاملے پر ای ٹی وی بھارت کے نمائندے نے انور شاہد سے بات کی جس میں انہوں نے بتایا کہ 'پولیس کے ذریعے ایف آئی آر درج کی جاچکی ہے تاہم ابھی تک دھمکی دینے والے شخص کی شناخت نہیں ہوپائی ہے۔'

حالانکہ انہوں نے بتایا کہ 'سنت نگر میں فی الحال ماحول ٹھیک ہے دکان مکمل طور پر کھل رہی ہیں اور علاقے کے لوگوں میں بھی دوکاندار کے لیے ہمدردی ہے اور وہ چاہتے ہیں کہ شرپسند عناصر ان کی اس گنگا جمنی تہذیب میں نفرت کا سیاسی کھیل کھیلنے میں کامیاب نہ ہوں۔'