Assembly elections 2023 پانچ ریاستوں میں آج انتخابی شیڈول کا اعلان

الیکشن کمیشن کی جانب سے آج پانچ ریاستوں میں اسمبلی انتخابات کے شیڈول کا اعلان کیے جانے کا امکان ہے۔

نئی دہلی: الیکشن کمیشن آج پانچ ریاستوں مدھیہ پردیش، چھتیس گڑھ، میزورم، تلنگانہ اور راجستھان میں اسمبلی انتخابات کا اعلان کرنے جا رہا ہے۔ کمیشن کے افسران کے مطابق چیف الیکشن کمشنر راجیو کمار دیگر دو الیکشن کمشنروں کے ساتھ آج دوپہر 12 بجے ایک پریس کانفرنس میں ان ریاستوں کے انتخابی شیڈول کا اعلان کریں گے۔

ان ریاستوں میں اس سال کے آخر تک اسمبلی انتخابات ہونے ہیں۔ عہدیداروں نے بتایا کہ کمیشن نے ان ریاستوں میں منصفانہ اور پرامن انتخابات کرانے کے لئے تمام تیاریاں مکمل کرلی ہیں جن میں ووٹر لسٹوں کا جائزہ بھی شامل ہے۔ مجموعی طور پر پانچ ریاستوں میں 1,180 سے زیادہ انتخابی مشاہدین کا تقرر کیا جا رہا ہے، انتخابی شیڈول کے اعلان کے ساتھ ہی ان ریاستوں میں ماڈل کوڈ آف کنڈکٹ نافذ ہو جائے گا۔

واضح رہے کہ ان پانچ ریاستوں میں انتخابات کے اعلان سے پہلے سیاسی پارٹیوں کی سرگرمیاں انتہائی عروج پر ہیں۔ ان ریاستوں کی حکمراں پارٹی سمیت دیگر پارٹیاں عوامی ریلیاں اور جلسے وغیرہ کرنے میں مصروف ہیں۔ ایک دوسرے پر انتخابات کے پیش نظر الزام اور جوابی الزام کا دور بھی جاری ہے۔ ریاست تلنگانہ میں حکمراں پارٹی بی آر ایس سمیت بی جے پی اور کانگریس انتہائی سرگرم ہیں۔ وزیراعظم مودی ایک ہفتے کے دوران تین مرتبہ تلنگانہ کا دورہ کرچکے ہیں۔ وہیں دوسری جانب کانگریس تلنگانہ میں کرناٹک کی حکمت عملی کو اپنانے کی کوشش کرہی ہے۔