دہلی حکومت سے 9 اسٹیڈیم کو جیل میں تبدیل کرنے کا مطالبہ

زراعت سے متعلق کسانوں کے دہلی سفر کا خیال رکھتے ہوئے دہلی پولیس نے دہلی حکومت سے 9 اسٹیڈیم کو عارضی طور پر جیل میں تبدیل کرنے کا مطالبہ کیا ہے۔

پنجاب اور ہریانہ کے کسان زراعت قانون کے خلاف مسلسل احتجاج کر رہے ہیں۔ دہلی پولیس کی جانب سے ان کسانوں کو دہلی بارڈر پر ہی روکا گیا ہے ۔

ایسی صورتحال میں دہلی پولیس نے دہلی حکومت سے دہلی کے 9 اسٹیڈیم کو عارضی طور پر جیل میں تبدیل کرنے کا مطالبہ کیا ہے تاکہ اگر کوئی کسان دہلی میں مظاہرہ کرتا ہے تو حراست میں لے کر انہیں عارضی جیل میں رکھا جائے گا۔

دہلی پولیس کے عہدیداروں کا کہنا ہے کہ دہلی میں ہزاروں کی تعداد میں کسان مختلف سرحدوں پر مظاہرہ کر رہے ہیں۔ اگر وہ دہلی میں داخل ہونے میں کامیاب ہوتے ہیں تو دہلی کا امن نظام خراب ہوسکتا ہے۔ لہذا اپنی تیاریوں کو ثابت کرنے کے لئے دہلی پولیس نے دہلی حکومت سے عارضی جیل بنانے کی اجازت طلب کی ہے۔