نئی دہلی:دہلی ہائی کورٹ نے آج مرکز اور آرکیالوجیکل سروے آف انڈیا (اے ایس آئی) سے دہلی وقف بورڈ کی انتظامی کمیٹی کی ایک عرضی پر اپنے موقف کی وضاحت کرنے کو کہا، جس میں بورڈ نے مغل مسجد میں نماز ادا کرنے سے روکنے کا مقدمہ زیر التوا رکھا ہے۔ غور طلب ہے کہ مہرولی علاقے میں واقع مغل مسجد انتطامیہ کی جانب سے یہ عرضی داخل کی گئی تھی ۔اب مسجد کے ذمہ داران نے اپنی عرضی کو جلد نمٹانے کی درخواست کی ہے۔ جسٹس منوج کمار اوہری نے بورڈ کی عرضی پر سماعت کرتے ہوئے یہ نوٹس جاری کیے۔ درخواست میں سپریم کورٹ کے حکم کی روشنی میں بورڈ نے 21 اگست کی مقررہ تاریخ سے پہلے معاملے کی سماعت کرنے کی اپیل کی ہے۔
یہ بھی پڑھیں:
سپریم کورٹ نے ہائی کورٹ سے اس معاملے کو جلد سے جلد نمٹانے کی درخواست کی تھی۔ درخواست گزار کی جانب سے وکیل ایم سفیان صدیقی نے کہا کہ یہ معاملہ کافی عرصے سے زیر التوا ہے۔ انہوں نے اس معاملے کی سماعت 27 اپریل کو کرنے کی بھی اپیل کی۔ صدیقی نے کہا کہ اس معاملے کی فوری سماعت کی ضرورت ہے کیونکہ رمضان کا مہینہ چل رہا ہے اور جلد ہی عید الفطر آنے والی ہے ایسے میں نمازی مغل مسجد میں عید کی نماز ادا کرنے کے منتظر ہیں۔ جسٹس اوہری نے کہا کہ نوٹس جاری کریں۔ اپریل کے آخر میں سماعت کے لیے معاملے کو فہرست میں شامل کیا گیا ہے۔
بورڈ نے آرکیالوجیکل سروے آف انڈیا (اے ایس آئی) کے دہلی کے مہرولی علاقے میں واقع مغل مسجد میں نماز پر پابندی کے حکم کے خلاف ہائی کورٹ کا رخ کیا ہے۔ درخواست گزار نے ہائی کورٹ سے رجوع کرتے ہوئے شکایت کی کہ اے ایس آئی اہلکاروں نے بغیر کوئی نوٹس یا حکم جاری کرتے ہوئے 13 مئی 2022 سے مغل مسجد میں نماز پڑھنے پر مکمل پابندی عائد کر دی، جو کہ "بالکل غیر قانونی" ہے۔ اس سے قبل سپریم کورٹ نے دہلی ہائی کورٹ کے اس حکم کو چیلنج کرنے والی ایک عرضی کو خارج کر دیا تھا جس میں اس نے مسجد میں نماز کو روکنے کے خلاف دہلی وقف بورڈ کی مینجمنٹ کمیٹی کی درخواست پر قبل از وقت سماعت کرنے سے انکار کر دیا تھا۔
مزید پڑھیں:Qutub Minar Complex قطب مینار کے احاطے میں پوجا کی اجازت سے متعلق عرضی پر آج سماعت
تاہم سپریم کورٹ نے ہائی کورٹ سے کہا تھا کہ وہ زیر التواء معاملے کی سماعت کرے اور جلد از جلد اس کا فیصلہ کرے۔ درخواست میں کہا گیا کہ مسجد کو ایک محفوظ یادگار کی فہرست میں شامل نہیں کیا گیا تھا۔ وہ محفوظ یادگاروں کا حصہ بھی نہیں تھی اور اسے گزشتہ سال 13 مئی سے پہلے کبھی نماز کے لیے بند نہیں کیا گیا تھا۔ ہائی کورٹ کے سامنے دائر درخواست کا جواب دیتے ہوئے اے ایس آئی نے کہا کہ مسجد قطب مینار کے احاطے میں آتی ہے اور اس لیے محفوظ علاقے میں ہے، جہاں نماز کی اجازت نہیں دی جا سکتی۔
قبل ازیں دہلی ہائی کورٹ نے رمضان کے مہینے میں قطب مینار کمپلیکس کے اندر واقع مسجد میں نماز پڑھنے کی اجازت مانگنے والی درخواست کو 27 اپریل کو سماعت کے لیے درج کیا۔ اس سال رمضان کا مہینہ بائیس یا تیئیس اپریل کو ختم ہو رہا ہے۔ جسٹس منوج کمار اوہری نے دہلی وقف بورڈ کی انتظامی کمیٹی کی درخواست پر نوٹس جاری کیا۔ جس میں مسجد میں نماز پڑھنے پر مبینہ پابندی کے خلاف زیر التواء عرضی کو جلد نمٹانے کا مطالبہ کیا گیا تھا۔ درخواست میں یہ بھی کہا گیا ہے کہ رمضان المبارک میں مسجد میں نماز پڑھنے کی اجازت دی جائے۔ اس مسجد کو 'مغل مسجد' کہا جاتا ہے۔ یہ قطب کمپلیکس کے اندر واقع ہے۔
27 اپریل کو اگلی سماعت کے لیے درخواست کی فہرست بناتے ہوئے عدالت نے یونین آف انڈیا اور آرکیالوجیکل سروے آف انڈیا (اے ایس آئی) سے جواب طلب کیا۔ مرکزی درخواست 21 اگست کو سماعت کے لیے درج ہے۔ یہ درخواست سپریم کورٹ کے حالیہ حکم کے بعد دائر کی گئی ہے، جس میں ہائی کورٹ سے اس معاملے کا جلد از جلد فیصلہ کرنے کی درخواست کی گئی ہے۔ درخواست گزار کی طرف سے ایڈوکیٹ ایم سفیان صدیقی پیش ہوئے، جب کہ ایڈوکیٹ کیرتیمان سنگھ یونین آف انڈیا کی طرف سے پیش ہوئے۔ جیسا کہ عدالت نے ابتدائی طور پر مئی کے اوائل میں اس معاملے کی سماعت کے لیے فیصلہ کیا تھا، صدیقی نے کہا کہ رمضان کے مہینے میں نماز کی اجازت دینے کی درخواست کی گئی ہے۔
