نئی دہلی: دہلی کے وزیر اعلی اروند کیجریوال نے منگل کو کہا کہ شہر کے باشندوں کو ٹریفک جام سے نجات دلانے کے لیے پورے شہر میں 77 ٹریفک ہاٹ اسپاٹ کو جام سے پاک کیا جائے گا۔ کیجریوال نے نائب وزیر اعلیٰ اور پی ڈبلیو ڈی کے وزیر منیش سسودیا اور محکمہ کے اعلیٰ عہدیداروں کے ساتھ جائزہ میٹنگ کی اور دہلی کو جلد از جلد جام سے نجات دلانے کی ہدایت دی۔ Delhi Govt meeting
وزیر اعلیٰ نے کہا، "دہلی حکومت پورے شہر میں ٹریفک کے 77 ہاٹ اسپاٹ کو جام سے پاک بنائے گی۔ ہم سڑکوں کو نئے سرے سے ڈیزائن کریں گے اور بڑے پیمانے پر فلائی اوور، انڈر پاس اور فٹ اوور برج بنائیں گے تاکہ دہلی کے لوگوں کو ٹریفک جام سے آزاد کیا جا سکے۔ ان منصوبوں کو مرحلہ وار نافذ کیا جائے گا۔
انہوں نے کہا، "سب سے پہلے زیادہ ٹریفک کے دباؤ والے علاقوں کو جام سے پاک کیا جائے گا۔ ہم امید کرتے ہیں کہ یہ اقدام دہلی کو ہندوستان اور پوری دنیا میں بہترین قابل رہائش شہر کے طور پر ترقی دینے کی سمت ایک اہم قدم ثابت ہوگا۔ اس پروجیکٹ کے تحت آؤٹر رنگ روڈ، نجف گڑھ روڈ، وزیرآباد روڈ، روہتک روڈ، آنند وہار-اپسرا روڈ سمیت تمام شناخت شدہ کوریڈور کی بہتری سے لاکھوں لوگ مستفید ہوں گے۔