دہلی تشدد: 'جب میری گردن پر فسادیوں نے چاکو رکھا'

قومی دارالحکومت دہلی میں فسادیوں نے کروڑوں روپے کی املاک کو جلا کر خاکستر کر دیا، درجنوں آشیانوں کو اجاڑ دیا اور متعدد خاندانوں کی خوشیوں کو ماتم میں تبدیل کر دیا پھر بھی چین نہیں آیا تو عورتوں کے دامن پر ہاتھ ڈالا۔

ایسی ہی ایک خبر شیو وہار علاقہ کی ہے جہاں فسادیوں نے ایک تین بچوں کی ماں کی عزت سے کھیلنے کی کوشش کی لیکن وہ اس میں کامیاب نہیں ہو سکے۔

شیو وہار میں رہنے والی یہ خاتون برجپوری کے راجدھانی اسکول میں درس و تدریس کی خدمات انجام دیتی ہیں۔ جب وہاں پر فساد بھڑکا تو اس دوران وہ بھی شیو وہار سے اپنے بچوں سمیت گھر چھوڑ کر جانے کے لیے مجبور ہو گئی تبھی کچھ شر پسندوں نے انہیں گھیر لیا اور ان کی گردن پر چھری رکھ کر اندر کھینچنے کی کوشش کی۔

خاتون نے بتایا کہ 'اس پورے حادثے کے بعد ان کا بڑا بیٹا ڈپریشن کا شکار ہو گیا ہے۔'

انہوں نے بتایا کہ وہ پورا دن دربدر بھٹک رہی تھیں تبھی انہیں معلوم ہوا کہ الہند ہسپتال میں بے سہارا لوگوں کے ٹھہرنے کے لیے عارضی انتظام کیا گیا ہے تب وہ اپنے بچوں کے ساتھ یہاں آ گئیں۔'