عمر خالد ایک اور کیس میں گرفتار

قومی دار الحکومت دہلی میں جواہر لعل نہرو یونیورسٹی کے سابق طالب علم عمر خالد کو دہلی کی کرائم برانچ کی جانب سے گرفتار کر لیا گیا ہے۔

جے این یو کے سابق طالب علم اور یو اے پی اے کے ملزم عمر خالد کو جمعرات یعنی یکم اکتوبر کو کرائم برانچ میں رجسٹرڈ ایف آئی آر نمبر 101 کے تحت گرفتار کیا گیا ہے۔ انہیں مزید تفتیش کے لیے تین دن کی پولیس تحویل میں بھی بھیج دیا گیا ہے۔

یہ دوسری ایف آئی آر ہے جس کے تحت عمر خالد کو باضابطہ طور پر گرفتار کیا گیا ہے۔ 25 فروری 2020 کو درج کی جانے والی اس ایف آئی آر میں شمال مشرقی دہلی کے کھجوری خاص کے علاقے میں ہونے والے تشدد کی تحقیقات کی گئی جس کے بعد انہیں گرفتار کیا گیا۔

ان کے خلاف درج پہلی ایف آئی آر میں فسادات اور مجرمانہ سازش کے دیگر الزامات کے ساتھ ہی انسداد دہشت گردی قانون، غیر قانونی سرگرمیوں کی روک تھام ایکٹ (یو اے پی اے) کو بھی شامل کیا گیا تھا۔