Protest In Jamia Campus طلبہ تنظیموں کا جامعہ ملیہ اسلامیہ میں نوح تشدد کے خلاف احتجاج

متعدد طلبہ تنظیموں نے آج جامعہ ملیہ اسلامیہ میں ہریانہ کے نوح میں ہوئے تشدد کے خلاف احتجاجی مظاہرہ کیا، جس میں بجرنگ دل کے رکن مونو مانیسر کی گرفتاری اور انہدامی کارروائی کے متاثرین کیلئے معاوضہ کا مطالبہ کیا گیا۔

نئی دہلی:قومی دارالحکومت نئی دہلی میں واقع جامعہ ملیہ اسلامیہ کے یونیورسٹی کے گیٹ نمبر 7 پر مختلف تنظیموں سے تعلق رکھنے والے تقریباً 100 طلباء نے اپنا احتجاج درج کرایا ان طلبہ کے ہاتھوں میں موجود پوسٹر پر، "نوح کو بچاؤ"، "28 اگست کو وی ایچ پی کی شوبھا یاترا روکو"، "تشدد بند کرو" اور "مونو مانیسر کو گرفتار کرو" لکھا ہوا تھا۔ ایک مظاہرین، محمد الفاؤز نے ای ٹی وی بھارت کو بتایا کہ ہمارے مرکزی حکومت سے تین مطالبات ہیں- بے گناہ مسلمانوں کے خلاف ایف آئی آر کو منسوخ کریں، ان لوگوں کو معاوضہ فراہم کریں جن کے گھروں کو بلڈوزر کارروائی کے ذریعے زمین دوز کیا گیا ہے اور مونو مانیسر کو گرفتار کیا جائے۔

واضح رہے کہ ہریانہ کے نوح میں 28 اگست کو وشو ہندو پریشد (وی ایچ پی) کی مجوزہ 'برج منڈل جلابھشیک یاترا' کو حکام نے پہلے ہی اجازت دینے سے انکار کر دیا ہے۔ قابل ذکر ہے کہ گذشتہ 31 جولائی کو ریاست ہریانہ کے نوح ضلع میں فرقہ وارانہ تشدد ہوا تھا اس دوران ہجوم نے مبینہ طور پر نوح میں پتھراؤ کر خوب آگ زنی کی تھی۔ اس کے بعد نوح میں ہوئے تشدد کی آج دیگر اضلاع میں بھی پھیل گئی تھی جس میں تقریباً 1 درجن مساجد کو نقصان پہنچایا گیا اس دوران ایک نایب امام دو اور ہوم گارڈز سمیت چھ افراد مارے گئے۔ وی ایچ پی لیڈر دیویندر سنگھ نے کہا تھا کہ وہ اجازت کے مسترد ہونے کے بارے میں نہیں جانتے تھے اور کہا تھا کہ یاترا کے لیے "کسی اجازت کی ضرورت نہیں ہے۔

وہیں جماعت اسلامی ہند کی طلباء تنظیم کے رکن نے بتایا کہ احتجاج کرنے والے طلباءمنصوبہ کے مطابق ہریانہ بھون تک مارچ نہیں کر سکے، کیونکہ انہیں پولیس نے اجازت نہیں دی۔ انہوں نے دعویٰ کیا کہ جامعہ کے گیٹ نمبر 7، 8 اور 9 کو تالا لگا دیا گیا تھا۔ ہمیں بتایا گیا کہ اگر احتجاج گیٹ سے باہر نکلا تو ہمیں طویل عرصے تک حراست میں رکھا جائے گا۔ طلباء کی تنظیمیں جن میں آل انڈیا اسٹوڈنٹس ایسوسی ایشن، آل انڈیا ریوولیوشنری اسٹوڈنٹس آرگنائزیشن، برادرانہ تحریک، مسلم اسٹوڈنٹس فیڈریشن، میوات اسٹوڈنٹس یونین، نیشنل اسٹوڈنٹس یونین آف انڈیا اور اسٹوڈنٹس فیڈریشن آف انڈیا (این ایس یو آئی) شامل تھی۔

پولیس کے مطابق 31 جولائی کو نوح میں ہونے والے فرقہ وارانہ تصادم کے سلسلے میں اب تک 61 ایف آئی آر درج کی گئی ہیں اور 286 ملزمان کو گرفتار کیا گیا ہے۔اس سے قبل، پنجاب اور ہریانہ ہائی کورٹ نے مسلم اکثریتی نوح میں "غیر قانونی طور پر تعمیر شدہ" عمارتوں کے انہدام پر از خود نوٹس لیتے ہوئے اس پر روک لگا دی تھی۔