دہلی پولیس نے یشونت سنہا کو حراست میں لینے کے بعد رہا کیا

مزدوروں کے حق کے لیے سابق مرکزی وزیر خزانہ یشونت سنہا دہلی کے راجگھاٹ پر دھرنے پر بیٹھے تھے جس کے سبب انہیں حراست میں لیا گیا تھا، تو وہیں انہیں کچھ گھنٹے بعد دہلی پولیس نے رہا کر دیا۔

سابق مرکزی وزیر خزانہ یشونت سنہا کو حراست میں لینے کے بعد اب دہلی پولیس نے انہیں رہا کر دیا ہے۔ ڈی سی پی سنجے بھاٹیا کا کہنا ہے کہ تھانے لائے گئے تمام لوگوں کو رہا کر دیا گیا ہے۔ ایف آئی آر پر فیصلہ بعد میں لیا جائے گا۔

اس سے قبل سابق مرکزی وزیر خزانہ یشونت سنہا کو دہلی پولیس نے گرفتار کیا تھا۔ اس کی تصدیق انہوں نے خود ایک ٹویٹ کے ذریعے کی تھی۔ انہوں نے ٹویٹ کیا کہ ہمیں ابھی دہلی پولیس نے گرفتار کیا ہے۔

واضح رہے کہ یشونت سنہا کل صبح 11 بجے دہلی کے راجگھاٹ پر مزدوروں کی پریشانیوں کو لے کر دھرنے پر بیٹھے تھے۔

اس دوران ای ٹی وی بھارت کی ٹیم نے ان سے بات کی تو انہوں نے کہا کہ بھارت سرکار فوج کی مدد سے مزدوروں کو ان کے گھروں تک پہنچائے۔