نئی دہلی:دہلی پولیس نے ایک 72 سالہ شخص کو حال ہی میں بغیر اجازت کے جامع مسجد کے علاقے میں مبینہ طور پر احتجاج کرنے اور بی جے پی کے سابق عہدیداروں کی طرف سے پیغمبر اسلام کے بارے میں کیے گئے متنازعہ تبصرے کے خلاف فرقہ وارانہ ہم آہنگی میں خلل ڈالنے کے الزام میں گرفتار کیا ہے۔ اس سے قبل دہلی پولیس نے ہفتہ کی رات احتجاج کے سلسلے میں جامع مسجد کے رہائشی محمد ندیم زید (45) اور ترکمان گیٹ علاقے کے رہنے والے محمد فہیم خان (37) کو گرفتار کیا تھا۔ پولیس نے بدھ کو بتایا کہ ملزم کی شناخت انورالدین کے نام سے ہوئی ہے جو جامع مسجد کے مٹیا محل علاقے میں رہتا ہے۔
ایک سینئر پولیس اہلکار نے بتایا کہ انور الدین کی اس علاقے میں ایک موٹر کی دکان ہے اور وہ اس سے قبل 10 مجرمانہ مقدمات میں ملوث تھا، جن میں سے تین فسادات سے متعلق تھے۔ پولیس کے مطابق ابتدائی تفتیش سے معلوم ہوا ہے کہ لوگوں کو واٹس ایپ گروپس کے ذریعے متحرک کیا گیا تھا۔ دراصل 10 جون کو جامع مسجد کے باہر اچانک مظاہرہ شروع ہوا اور سینکڑوں لوگوں نے بی جے پی کی معطل ترجمان نوپور شرما کی گرفتاری کا مطالبہ کرنا شروع کر دیا۔