کورونا وبا کے پیش نظر دہلی میں بند پڑے مذہبی مقامات کے دروازوں اب عقیدت مندوں کے لیے کھولنے کی مشروط اجازت دے دی گئی ہے۔
دہلی ڈیزاسٹر مینجمنٹ اتھارٹی (ڈی ڈی ایم اے) نے جمعہ سے عقیدت مندوں کے لیے مذہبی مقامات کو دوبارہ کھولنے کی اجازت دی ہے لیکن اس دوران رہنما ہدایات اور ایس او پیز پر سختی سے عمل کرنا ضروری ہوگا۔
آنے والے دنوں میں شروع ہونے والی نوراتری کے پیش نظر ڈی ڈی ایم اے کا یہ حکم بہت اہم ہے۔ تاہم جمعرات کے روز ڈی ڈی ایم اے نے ایک حکم جاری کیا کہ عوامی مقامات پر چھٹ کا تہوار منانے پر پابندی عائد کی گئی ہے۔
ڈی ڈی ایم اے کا یہ حکم وجے دیو، چیف سکریٹری، حکومت دہلی نے جاری کیا ہے۔
طویل انتظار کے بعد دہلی حکومت نے جمعہ کے روز سے عقیدت مندوں کے لیے مذہبی مقامات کو دوبارہ کھول دیا ہے۔ لیکن ساتھ ہی حکومت نے ہدایات دی ہیں کہ مذہبی مقامات پر کورونا ہدایات پر سختی سے عمل کیا جائے۔
ڈی ڈی ایم اے نے اس سے متعلق ایک حکم نامہ بھی جاری کیا ہے جس میں عوامی مقامات، میدان، مندروں اور گھاٹوں پر چھٹ پوجا کے انعقاد پر پابندی عائد کردی گئی ہے۔ لوگوں سے گھروں میں عبادت کرنے کی اپیل کی گئی ہے۔ اس کے ساتھ، میلے، کھانے کے اسٹال، جھولا، جلسے اور جلوس وغیرہ کی اجازت نہیں ہوگی۔
ڈی ڈی ایم کا یہ حکم 15 نومبر تک نافذ ہوگا۔ ڈی ڈی ایم نے تہواروں کے پورے سیزن کے لیے رہنما ہدایات جاری کیے ہیں، جس میں کہا گیا ہے کہ تہواروں کے اس سیزن میں کہیں بھیڑ جمع ہونے کی اجازت نہیں ہوگی۔
واضح رہے کہ دہلی میں نوراتری کے دوران، بڑی تعداد میں عقیدت مند دور دراز سے کالکا جی مندر، چھتر پور مندر اور جھنڈے والان مندر کے درشن کے لیے آتے ہیں۔ مارچ 2020 میں پہلی بار لاک ڈاؤن کے بعد سے ہی یہ تمام مندر عقیدت مندوں کے لیے بند تھے'۔
