مستقیم کا بھائی افساد دہلی کی اسی بلڈنگ میں جیکٹ بنانے کی فیکٹری میں کام کرتا تھا جہاں آتشزدگی کا واقعہ رونما ہوا ہے۔
مستقیم نے بتایا کہ 'اس کا بھائی افساد اسی بلڈنگ مین رہائش پذیر تھا لیکن آتشزدگی کے بعد اسے اپنے بھائی کے بارے میں کوئی بھی معلومات نہیں مل پا رہی ہے اور وہ پورے علاقے میں گھوم رہا ہے۔
تفصیلات کے مطابق جب آتشزدگی کا واقعہ پیش آیا اس وقت افساد بلڈنگ میں موجود تھا لیکن اس کے بارے میں ابھی تک کوئی بھی سراغ نہیں ملا۔
آتشزدگی کے اس دردناک واقعہ میں مرنے والے زیادہ تر لوگوں کی شناخت ابھی تک نہیں ہو سکی ہے، ایسے میں یہ واضح نہیں ہو سکا ہے کہ افساد کہاں اور کس حال میں ہے۔
افساد کا بھائی مستقیم مسلسل اسے تلاش رہا ہے لیکن پولیس کی جانب سے کوئی تسلی بخش جواب نہیں مل رہا ہے۔
مستقیم نے بتایا کہ اس کا بھائی صبح اپنے آبائی وطن بہار جانے والا تھا، اس لیے اس نے صبح اسے اپنے گھر بلایا تھا لیکن صبح جب اس نے فون کیا تو بھائی سے بات نہیں ہو سکی جبکہ اس کے ساتھ رہنے والے لوگ بھی فون نہیں اٹھا رہے تھے جائے واردات پر پہنچا تب اسے آتشزدگی کا علم ہوا۔
مستقیم نے بتایا کہ 'وہ بہار کے سہرسہ کے رہنے والے ہیں اور وہ مسلسل اپنے بھائی کے بارے میں معلومات حاصل کرنے کی تگ و دو کر رہے ہیں لیکن ناکامی ہاتھ آ رہی ہے۔