دہلی اردو اکادمی کی سالانہ ایوارڈ تقسیم تقریب منعقد

دہلی اردو اکادمی کی جانب سے آج 2018 کی سالانہ ایوارڈ تقسیم تقریب منعقد کی گئی جس میں 9 متعدد شخصیات کو ایوارڈز سے نوازا گیا۔

اردو اکادمی کی ایوارڈ تقسیم تقریب میں دہلی کے نائب وزیر اعلی منیش سسودیا نے شرکت کی۔
تقریب میں پروفیسر شارب ردولوی کو کل ہند بہادر شاہ ظفر ایوارڈ سے نوازا گیا جس میں 2 لاکھ 51 ہزار روپئے نقد انعام دیا گیا۔

اسی طرح پروفیسر عتیق اللہ کو پنڈت برج موہن دتاتریہ کیفی ایوارڈ، پروفیسر وہاج الدین علوی کو ایوارڈ برائے تحقیق و تنقید، شکیل حسن شمسی کو ایوارڈ برائے صحافت، اظہار عثمانی کو ایوارڈ برائے تخلیقی نثر، ڈاکٹر جی آر کنول کو ایوارڈ برائے شاعری، پروفیسر انیس الرحمن کو ایوارڈ برائے ترجمہ نگاری، محترمہ رادھیکا چوپڑا کو ایوارڈ برائے غزل گائیکی اور استاد احمد حسین محمد حسین کو کل ہند ایوارڈ برائے فروغ اردو زبان و ادب و تہذیب سے نوازا گیا.حالانکہ کچھ لوگوں نے اس بات پر اعتراض جتایا کہ ایوارڈز میں سب سے بہترین استاد کے ایوارڈ کو شامل نہیں کیا گیا جبکہ 2008 سے اس سلسلہ کو ختم کر دیا تھا۔ اس سے قبل سنہ 1982 سے مسلسل سنہ 2008 تک بہترین استاد کے نام سے ایوارڈ تقسیم کیا جاتا رہا ہے.