Bail To Eight Accused in PFI Case پی ایف آئی سے منسلک ایک کیس میں آٹھ ملزمین ضمانت پر رہا

دہلی کی ایک عدالت نے پاپولر فرنٹ آف انڈیا سے منسلک ایک کیس کے سلسلے میں یو اے پی اے اور تعزیرات ہند کی سخت دفعات کے تحت دہلی پولیس کے ذریعہ گرفتار کیے گئے آٹھ افراد کو ضمانت دے دی ہے۔ Court Grants Bail to Eight Accused in PFI Case

دہلی:قومی درالحکومت دہلی کی ایک عدالت نے پاپولر فرنٹ آف انڈیا سے منسلک ایک کیس کے سلسلے میں یو اے پی اے اور تعزیرات ہند کی سخت دفعات کے تحت دہلی پولیس کے ذریعہ گرفتار کیے گئے آٹھ افراد کو ضمانت دے دی ہے۔ دہلی پولیس نے اکتوبر کے پہلے ہفتے میں انہیں گرفتار کیا تھا۔ اس دوران پولیس نے پی ایف آئی زندہ باد کے پمفلیٹس کے ساتھ پی ایف آئی کے کچھ جھنڈے بھی برآمد کیے تھے۔ Eight Accused Get Bail in PFI Case

عدالت نے ضمانت منظور کرتے ہوئے کہا کہ ملزمین پہلے ہی بالترتیب 3 اکتوبر 2022 اور 5 اکتوبر 2022 سے حراست میں ہے اور ان سے مزید تفتیش کی ضرورت نہیں ہے۔ انہیں سلاخوں کے پیچھے رکھنے سے کوئی فائدہ نہیں ہوگا۔ ایڈیشنل سیشن جج سنجے کھنگوال نے جاری کردہ ایک حکم میں شیخ گلفام حسین، عبداللہ، محمد شعیب، محسن خان، حبیب اصغر جمالی، عبدالرب، محمد وارث خان اور محمد شعیب کو 25 ہزار روپے کے ذاتی ضمانتی مچلکوں پر ضمانت پر رہا کرنے کا حکم دیا۔

عدالت نے دہلی پولیس کی تفتیش پر سوال اٹھاتے ہوئے کہا کہ ایک طرف سی سی ٹی وی فوٹیج میں نظر آنے والے افراد واضح نہیں ہیں اور دوسری طرف ان گاڑیوں کا رجسٹریشن نمبر بھی صاف نہیں ہے، جن میں انہیں زبردستی لیکر جایا جا رہا ہے۔ ان حالات کے پیش نظر اس ثبوت پر تبصرہ کرنا مناسب نہیں ہوگا۔ اگرچہ یہ مقدمہ زیر سماعت ہے اور ملزمین کو ٹھوس شواہد کی روشنی میں اپنا دفاع کرنے کی آزادی ہے پھر بھی، موجودہ درخواستوں کی سماعت کے دوران تیار کردہ مواد کو دیکھتے ہوئے سی سی ٹی وی فوٹیج پر ایسی کوئی رائے قائم نہیں کی جا سکتی ہے۔

ملزمین کی طرف سے ایڈوکیٹ مجیب الرحمان پیش ہوئے اور دلیل دی کہ موجودہ کیس میں ملزمین کے خلاف یو اے پی اے کی دفعہ 10 اور 13 اور دفعہ 153A/120B آئی پی سی کے تحت ایف آئی آر درج کی گئی تھی۔ ملزمین کے خلاف جرم بنیادی طور پر اس تنظیم کے ممبر ہونے کے بارے میں ہے جسے 29.09.2022 کے نوٹیفکیشن کے ذریعے غیر قانونی قرار دیا گیا تھا۔

انہوں نے کہا کہ ملزمان پر کسی دہشت گردانہ سرگرمیوں میں ملوث ہونے کا کوئی الزام نہیں ہے اور ملزمان کے خلاف لگائے گئے جرم کی سزا اس سے زیادہ نہیں ہے۔ دہلی پولیس کے مطابق، 30/09/22 کو مختلف دفعات کے تحت ایک ایف آئی آر ممنوعہ غیر قانونی تنظیم پی ایف آئی اور اس کے دیگر ساتھیوں/فرنٹوں کے خلاف پولیس اسٹیشن شاہین باغ، دہلی میں درج کی گئی تھی۔

واضح رہے کہ گزشتہ دنوں مرکزی حکومت نے پاپولر فرنٹ آف انڈیا پر 5 سال کی پابندی عائد کی تھی۔ اس سے قبل دہلی پولیس نے بھی 50 مقامات پر چھاپے مارے اور مرکزی ایجنسیوں کے انپٹ کے ساتھ پی ایف آئی سے منسلک 32 افراد کو گرفتار کیا۔