دہلی اسمبلی انتخابات کے ووٹوں کی گنتی کے لیے 11 اضلاع میں 21 مراکز قائم کیے گئے ہیں۔
اسمبلی کی 70 نشستوں کے لیے 8 فروری کو پولنگ ہوئی تھی، اس کے بعد ای وی ایم کو 21 کاؤنٹنگ سینٹرز پر بنائے گئے اسٹرانگ روم میں سخت سکیورٹی انتطامات میں رکھا گیا ہے۔
دہلی الیکشن کمیشن کے دفتر سے ملی اطلاع کے مطابق ووٹوں کی گنتی کے دوران کسی بھی ناخوشگوار واقعہ کو روکنے کے لیے سکیورٹی کے سخت انتظامات کیے گئے ہیں جس میں دہلی پولیس، ہوم گارڈ اور نیم فوجی دستوں کو تعینات کیا جائے گا۔
پولیس کے مطابق ووٹوں کی گنتی کے دوران کسی بھی ناخوشگوار واقعہ سے نمٹنے کے لئے 50 ٹیموں کو ریزرو رکھا گیا ہے، ہر ٹیم میں 40 تا 45 جوان شامل ہیں۔
شمال مغربی ضلع میں ووٹوں کی گنتی کے تین مراکز بنائے گئے ہیں، نریلا روڈ پر گھیورا میں واقع چھوٹو رام دیہی انسٹی ٹیوٹ آف ٹکنالوجی میں دو رٹھالہ اور کراری اسمبلی سیٹوں کے لیے رائے شماری کی جائے گے۔
کرالا میں واقع سرودے کنیا ودیالیہ میں منڈکا اسمبلی نشست کی ووٹوں کی گنتی ہوگی، منگولپوری صنعتی علاقہ فیز ون میں واقع آئی ٹی آئی میں سلطان پور ماجرا اور منگولپوری اسمبلی سیٹ کی گنتی ہوگی، پیتم پورا میں منی مایا رام جین روڈ پر واقع کستوربا انسٹی ٹیوٹ آف ٹکنالوجی اور گرو گووند سنگھ کالج میں شالیمار باغ اور تری نگر اسمبلی سیٹوں کے ووٹوں کی گنتی ہوگی۔
شمال مشرقی دہلی کی گوکل پوری، مصطفیٰ آباد اور کراول نگر اسمبلی سیٹوں کے ووٹوں کی گنتی نند نگری میں واقع آئی ٹی آئی کی نئی بلڈنگ میں ہوگی، اس کے علاوہ سیلم پور اور گونڈا اسمبلی کے ووٹ پشتہ روڈ کے نزدیک شاستری پارک میں جی بی ایس میں ووٹوں کی گنتی ہوگی۔
وسطی ضلع کی سات اسمبلی نشستوں براڑی، تمار پور، صدر بازار، چاندنی چوک، مٹیا محل، بلی مارا ن اور کرول باغ کے ووٹوں کی گنتی دھیرت پور میں واقع سر سی وی رمن انڈسٹریل ٹریننگ انسٹی ٹیوٹ میں ہوگی۔
جنوبی ضلع کی پانچ اسمبلی سیٹوں کی گنتی کے لیے دو مقامات پر کاؤنٹنگ سینٹر بنائے گئے ہیں، ان میں مالویہ نگر، مہرولی اور چھتر پور کے ووٹ سری فورٹ روڈ میں واقع جیجا بائی اندسٹریل ٹریننگ انسٹی ٹیوٹ جبکہ دیولی اور امبیڈکر نگر کے ووٹوں کی گنتی ساکیت کے جے بلاک میں واقع ویر چندر سنگھ گڑوالی سرودیہ بال ودیالیہ میں ہوگی۔
