مسافر کے پاس سے 30 لاکھ کا سونا برآمد

دہلی کے اندرا گاندھی بین الاقوامی ہوائی اڈے پر کسٹم ڈپارٹمنٹ کی ٹیم نے ماسکو سے دہلی آنے والے مسافر سے تقریبا 30 لاکھ مالیت کا سونا ضبط کیا ہے۔

کسٹم کی جوائنٹ کمشنر انوبھا سنہا کے مطابق، جب مسافر ایئر پورٹ پہنچا اور جب اس نے گرین چینل کو عبور کیا تو کسٹم حکام کو اس پر شبہ ہوا۔ جس کے بعد افسران نے اس کے سامان کی تلاشی لی۔

تلاشی لینے پر اس کے کپڑوں کے اندر سے سونے کی چار تار اور آدھا درجن سونے کے بسکٹ برآمد ہوئے۔کسٹم کے مطابق، تمام سونے کا وزن 794 گرام ہے اور اس کی قیمت تقریبا 30 لاکھ روپے بتائی جارہی ہے۔تفتیش کے بعد کسٹم ٹیم نے مزید کاروائی شروع کر دی ہے اور اس معاملے میں کسٹم ایکٹ کی دفعہ 110 کے تحت تمام سونا ضبط کر لیا گیا ہے۔ مسافر کو دفعہ 104 کے تحت گرفتار کر کے جیل بھیج دیا گیا ہے۔