پی ایم او نے کورونا وائرس سے نمٹنے کے لیے تیاریوں کا جائزہ لیا

کورونا وائرس انفیکشن کے پیش نظر وزیراعظم کے پرنسپل سکریٹری نے آج صورتحال سے نمٹنے کی تیاریوں کا جائزہ لیا۔

قومی دارالحکومت دہلی میں ملک میں پھیلے مہلک کورونا وائرس کے انفیکشن کے بڑھتے ہوئے واقعات کے پیش نظر وزیراعظم کے پرنسپل سکریٹری پی کے مشرا نے آج ایک اجلاس میں صورتحال سے نمٹنے کی تیاریوں کا جائزہ لیا، اور وزارت داخلہ سے تمام ریاستوں کے ساتھ رابطہ قائم کرنے کو کہا ہے۔

تمام وزارتوں سے کانفرنسیز اور بین الاقوامی اجلاس کے انعقاد سے قبل وزارت صحت سے مشورہ کرنے کو کہا گیا ہے۔

اجلاس میں اس بات پر زور دیا گیا کہ کورونا وائرس کی صورتحال سے نمٹنے کے لیے ریاستوں کے ساتھ مشترکہ طور پر پورے ملک کے لیے ایک پالیسی بنائی جائے۔

وزیراعظم کے پرنسپل سکریٹری پی کے مشرا

اس چیلنج سے نمٹنے کی مہم میں کمیونٹیز اور بلدیاتی اداروں کے ساتھ ساتھ نجی شعبے کو بھی شامل کرنے کے امکانات کی تلاش پر زور دیا گیا۔

ریاستی حکومتوں کے تعاون سے ملک کے مختلف حصوں میں ضلعی سطح تک وائرس کی جانچ اور مشتبہ افراد کو رکھنے کے لیے خصوصی مراکز قائم کرنے کا بھی فیصلہ کیا گیا۔

وزارت داخلہ ، دفاع، ریلوے اور وزارت محنت سے بھی اپنی سہولیات کو مراکز اور ہسپتالز کو تعاون کرنے کو کہا گیا ہے۔

واضح رہے کہ کرونا وائرس سے متعلق 25 فروری کو وزیراعظم کے دفتر میں ایک میٹنگ بھی ہوئی تھی، اور اس معاملے پر یہ دوسرا اجلاس ہے۔

اجلاس میں کابینہ کے سکریٹری، سکریٹری خارجہ، صحت سکریٹری، سیاحت اور مختلف محکموں کے اعلی عہدیدار شریک ہوئے۔