نئی دہلی: کانگریس نے کورونا وائرس سے متاثرہ خاندانوں تک امداد پہنچانے کے لئے اپنی ملک گیر رابطہ مہم چلانے کا فیصلہ کیا ہے اور اوکھلا قانون ساز اسمبلی حلقہ سے آج اس کا باقاعدہ آغاز کردیا گیا۔
کانگریس کے سینئر لیڈر اور سابق ممبر پارلیمنٹ پرویز ہاشمی نے اوکھلا اسمبلی حلقہ کے سریتا وہار وارڈ میں عوامی رابطہ کی اس مہم کا آغاز کیا۔
اس دوران، دہلی پردیش کانگریس کے نمائندہ سندر سنگھ پپی نے کہا کہ 'پارٹی کے کارکنان گھر گھر جاکر کورونا وائرس سے متاثرہ تمام خاندانوں کے فارم بھر کر ڈیٹا اکٹھا کریں گے۔ اس میں، کورونا بحران کے دوران خاندان کے کسی ممبر کی موت، ملازمت کا فقدان، کاروبار برباد ہونے، حکومت کی طرف سے کسی بھی طرح کی مدد ملنے جیسے سوالات کے جوابات اکٹھے کیے جائیں گے۔
انہوں نے کہا کہ عوامی رابطہ مہم میں پارٹی کے کارکنان کورونا وائرس سے متاثرہ خاندانوں کو ضروری میڈیکل کٹس، ماسک، سینیٹائزر فراہم کریں گے اور غریب خاندانوں کو راشن مہیا کرائیں گے اور ٹیکے لگانے کے لئے رجسٹریشن کرنے میں بھی مدد کریں گے۔
مزید پڑھیں:
اس موقع پر پارٹی کے کارکنوں اور علاقہ کے معززین کی ایک بڑی تعداد موجود تھی، جن میں پڑپڑگنج ضلع کانگریس کے صدر دنیش گپتا خصوصی طورپر شامل تھے۔
قابل ذکر ہے کہ کانگریس پارٹی نے کورونا سے متاثرہ خاندانوں اور طبی عملہ کی مدد کرنے نیز مرنے والے افراد کا ڈیٹا اکٹھا کرنے کے لئے حال ہی میں ملک گیر رابطہ مہم چلانے کا اعلان کیا تھا۔ یہ مہم کانگریس، یوتھ کانگریس، پردیش کانگریس کمیٹیوں اور پارٹی کی دیگر تنظیموں کے ذریعہ چلائی جارہی ہے۔
