پارٹی نے اپنے ٹوئیٹر پیج پر ٹوئیٹ کیا،’’ وزیراعظم جی ، آئین کی نقل آپ کو بھیجی ہے اورجلد ہی یہ آپ کو مل جائیگی ۔برائے مہربانی اسے پڑھیں، نیک خواہشات کے ساتھ، کانگریس ۔‘‘
پارٹی نے کہا کہ ’’ آئین ہر فرد کی زندگی کے تحفظ اور اسکی ذاتی آزادی کو یقینی بناتا ہے، یہ آئین ہی ہے جو انصاف کے عمل کی اہمیت کو طے کرتا ہے۔ ملک وہی عظیم ہوتا ہے جہاں ہم آہنگی پر مبنی اورتعصب سے پاک سماج کی تعمیر ہو اور ہمارا آئین اسے یقینی بناتاہے ۔‘‘
کانگریس نے کہا کہ’’ ہمارا آئین کسی چیز کو مسلط کرنے کے نظریہ کی حمایت نہیں کرتا، ملک کے شہریوں کو اپنی مرضی سے مذہب کو ماننے کا حق دیتا ہے، حقیقی محب وطن وہی ہے جو حقوق کے ساتھ فرائض کی سچائی کو بھی تسلیم کرے اور ملک کی یکجہتی اور سالمیت کو برقرار رکھنے کے لیے عہدبند رہے ۔ ‘‘
اس سے پہلے پارٹی صدر سونیا گاندھی، سابق صدر راہل گاندھی، سابق وزیرا عظم منموہن سنگھ اور کانگریس جنرل سکریٹری پرینکا گاندھی سمیت کئی سینئر رہنماؤں نے پارٹی ہیڈکوارٹر میں آئین کی تمہید کو پڑھا۔
