مزدوروں کے ساتھ غیر ذمہ دارانہ سلوک

کانگریس نے مطالبہ کیا ہے کہ مہاجر مزدوروں کے ساتھ غیر ذمہ دارانہ سلوک پر وزيرریلوے استعفیٰ دیں۔

قومی دارالجکومت دہلی میں کانگریس نے آج کہا کہ وزارت ریلوے مہاجر مزدوروں کو اپنے گھر پہنچانے میں غیر ذمہ دارانہ رویہ اختیار کرتے ہوئے لاپرواہی سے کام کررہی ہے اور مزدوروں کو دی جانے والی سہولیات پر جھوٹ بولا جارہا ہے، لہذا وزیر ریلوے پیوش گوئل کو فوراً استعفیٰ دینا چاہیے، بصورت دیگر انہیں برخاست کردیا جائے۔

کانگریس کے ترجمان ابھیشیک منو سنگھوی نے ایک پریس کانفرنس میں کہا کہ حکومت بار بار یہ کہہ رہی ہے کہ مزدوروں کو مفت سفر کی سہولت دے کر گھر پہنچایا گیا ہے، جبکہ وزیر داخلہ امیت شاہ نے کہا ہے کہ 85 فیصد سبسڈی دے کر مزدوروں کو اپنے گھر پہنچایا گیا ہے۔

مرکزی حکومت کے وزرا اور بھارتیہ جنتا پارٹی (بی جے پی) کے رہنما ٹی وی چینلز پر ایسی ہی سبسڈی دینے کا دعویٰ کرتے رہے ہیں۔

کانگریس نے مطالبہ کیا ہے کہ مہاجر مزدوروں کے ساتھ غیر ذمہ دارانہ سلوک پر وزيرریلوے استعفی دیں

انہوں نے اس کو مہاجر مزدوروں کے ساتھ وحشیانہ مذاق قرار دیتے ہوئے کہا کہ حکومت ہر مسئلے پر جھوٹ بول رہی ہے اور وزیر ریلوے کی بد انتظامی سب کے سامنے ہے۔

لہذا وزیراعظم نریندر مودی کو انہیں فوری طور پر برخاست کرنا چاہیے یا خود انہیں اپنے عہدے سے استعفیٰ دینا چاہیے۔

انہوں نے کہا کہ ان مزدور سپیشل ٹرینز کے سفرکے دوران 81 لوگوں کی موت ہوچکی ہے اور مظفر پور ریلوے سٹیشن کے پلیٹ فارم پر فوت ہونے والی خاتون کے لواحقین کے بیانات سے مزدور مسافروں کی پریشانیوں کا پتہ چلتا ہے جنہوں نے کہا ہے کہ وہ خاتون بیماری کی وجہ سے نہیں بلکہ سفر میں پریشانیوں کی وجہ سے مر گئی ہے۔

مسٹر منوسنگھوی نے کہا کہ ریلوے میں افراتفری کا عالم یہ ہے کہ حکومت اس سلسلے میں غلط اعداد و شمار پیش کررہی ہے۔

اس عرصے میں حکومت کے ذریعہ مزدوروں کو گھر پہنچانے کے لیے 3740 سپیشل ٹرینیں چلائی گئیں، لیکن ان میں سے 40 فیصد گاڑیاں آٹھ گھنٹے تاخیر سے اپنی منزل پر پہنچ پائیں اور 421 گاڑیاں دس گھنٹے تاخیر سے پہنچیں، اس کے علاوہ 10 فیصد ٹرینز 12 گھنٹے تاخیر سے آئی ہیں۔

ان کے علاوہ 78 گاڑیاں ایک دن سے زیادہ تاخیر سے جبکہ 43 گاڑیاں ڈیڑھ دن کی تاخیر سے پہنچی ہيں۔

اس سچائی کو حکومت نے چھپائی ہے اور ٹرینیں مکمل لاپرواہی اور افراتفری سے چلائی گئی ہیں۔

انہوں نے کہا کہ حکومت کہتی ہے کہ سپیشل ٹرینز میں سفر کے لیے مہاجرمزدوروں سے کچھ نہیں لیا گیا، جبکہ شواہد سے پتہ چلتا ہے کہ ان سے اضافی رقم وصول کی جارہی ہے۔

سپریم کورٹ نے واضح طور پر کہا ہے کہ ٹرینز میں سفر کے لیے مزدوروں سے پیسہ نہیں لیا جانا چاہیے اور حکومت دعویٰ کررہی ہے کہ انہیں مفت پانی کی بوتلیں اور کھانا دیا جارہا ہے۔

مگر حکومت کے جھوٹے دعوے بے نقاب ہوچکے ہيں۔ اس لیے ان پریشان کن حقائق کو دیکھتے ہوئے وزیر ریلوے کو برخاست کیا جائے یا انہیں از خودمستعفی ہوجانا چاہیے۔