سابق رکن اسمبلی اور بی جے پی کے رہنما کَپل مشرا نے ٹوئٹر کے ذریعہ لوگوں سے موج پور چوک پر پہنچنے کے لیے کہا تھا۔ موج پور میں سی اے اے کی حمایت میں آئے مظاہرین نے نعرے بازی کی اور اس کے بعد پتھر باری شروع ہو گئی۔
ایک سینئر پولیس افسر نے کہا کہ کچھ دیر کے لیے پتھر باری ہوئی لیکن اب حالات قابو میں ہیں۔ علاقے میں کشیدگی کو مدِ نظر رکھتے ہوئے موج پور اور بابر پور میٹرو اسٹیشن کو کچھ وقت کے لیے بند کر دیا گیا ہے۔
وہیں مشرا نے ٹویٹ کرکے دہلی پولیس کو تین دن کا الٹی میٹم دیتے ہوئے کہا ہے کہ ’جعفرآباد اور چاند باغ کی سڑکیں خالی كرائے۔ اس کے بعد ہمیں مت سمجھا ئیے گا۔ ہم آپ کی بھی نہیں سنیں گے، صرف تین دن‘۔
انہوں نے ایک مزید ٹویٹ میں کہا کہ دہلی میں دوسرا شاہین باغ نہیں بننے دیں گے۔ اس کے ساتھ ہی مشرا نے پولیس کے سامنے بھی سڑکوں کو خالی کرنے کا الٹی میٹم دیا اور کہا کہ ان کے حامیوں کی جانب سے پتھراؤ نہیں کیا گیا ہے۔
سی اے اے کے خلاف احتجاج کو مدِ نظر رکھتے ہوئے جعفر آباد، سیلم پور، چاند باغ، موج پور اور اس کے ارد گرد اضافی سکیورٹی فورسز کو تعینات کیا گیا ہے۔