دہلی کا دل توڑ کر چینئی آٹھویں بار فائنل میں

اپنے گیند بازوں کی مؤثر کارکردگی اور اوپنر بلے بازوں فاف ڈو پلیسس (50) اور شین واٹسن (50) کی شاندار نصف سنچریوں کی بدولت سابقہ چمپئن چینئی سپر کنگز نے دہلی كیپٹلز کا پہلی بار فائنل میں پہنچنے کا خواب جمعہ کو چکنا چور کرتے ہوئے چھ وکٹوں سے جیت کر ریکارڈ آٹھویں بار آئی پی ایل کے خطابی مقابلے میں داخلہ حاصل کر لیا۔

آئندہ 12 مئی کو اس کا مقابلہ اپنے کٹر مخالف ممبئی انڈینس سے ہوگا۔

چینئی نے دیپک چاهر، ہربھجن سنگھ، رویندر جڈیجہ اور ڈیون براوو کے دو -دو وکٹ کی بدولت دہلی کو آئی پی ایل -12 کے دوسرے کوالیفائر میں 20 اوور میں 9 وکٹ پر 147 کے اسکور پر روک دیا اور پھر ڈو پلیسس اور واٹسن کی نصف سنچریوں سے یہ میچ 19 اوور میں 4 وکٹ پر 151 رن بنا کر جیت لیا۔

تین بار چیمپئن رہ چکی چینئی کی ٹیم آٹھویں بار اس ٹورنامنٹ کے فائنل میں پہنچی ہے۔ چینئی نے اس سے پہلے 2008، 2010، 2011، 2012، 2013، 2015 اور 2018 کے فائنل میں جگہ بنايي تھی اور اس نے 2010، 2011 اور 2018 میں خطاب جیتا تھا۔ چینئی کی ٹیم اب 12 مئی کو حیدرآباد میں ہونے والے فائنل میں تین بار کی چیمپئن ممبئی سے بھڑے گی۔