دارالحکومت دہلی چاندنی محل علاقے کو 10 اپریل سے کنٹینمینٹ زون میں تبدیل کیا گیا تھا، جسے اب کنٹینمینٹ زون سے باہر کر دیا گیا ہے۔
آج دوپہر کے وقت چاندنی محل علاقے میں لگے ٹین کو ہٹانے کا کام کیا گیا، جس کے بعد سے علاقے کے لوگوں میں خوشی کی لہر دوڑ گئی ہے۔
اس دوران مقامی ایم ایل اے شعیب اقبال بھی موقع پر نظر آئے۔ واضح رہے کہ چاندنی محل علاقے میں ایک ساتھ 54 کورونا کے کیسز سامنے آنے کے بعد دہلی میں کھلبلی مچ گئی تھی اس کے بعد سے ہی تمام علاقے کو سیل کر دیا گیا تھا۔
حالانکہ یہ تمام معاملے تبلیغی جماعت سے جڑے ہوئے لوگوں کے ہی تھے، جو چاندنی محل علاقے کی 13 مختلف مساجد میں ٹھہرے ہوئے تھے، تاہم اس کے بعد علاقے سے بھی کچھ معاملہ سامنے آئے جس کی وجہ سے علاقے کو کنٹینمینٹ زون میں ہی برقرار رکھا گیا تھا۔
قابل ذکر ہے کہ جب چاندنی محل علاقے کو سیل کیا گیا تھا تب مقامی ایم ایل اے کی ایک ویڈیو خوب وائرل ہوئی تھی جس میں وہ اپنے آپ کو ہی لاچار بتاتے ہوئے کہ رہے تھے کہ ان کے گھ کے باہر بھی ٹین لگا دیے گیے ہیں اور وہ بھی کچھ نہیں کر سکتے، لیکن اب جب ٹین کو ہٹایا جا رہا تھا تب اس کا سہرا اپنے سر پر باندھنے کے لیے موقع پر پہنچ کر اپنی سیاست چمکانے میں لگے۔