مہاجر ورکرز کی نقل مکانی: ریاستوں کو مرکز کا مشورہ

مرکز نے ریاستوں اور مرکزی زیرانتظام علاقوں سے کہا ہے کہ ریلوے کے ساتھ قریبی رابطہ کرتے ہوئے مہاجر مزدوروں کےلیے مزید خصوصی ٹرینیں چلائیں اور خواتین، بچوں اور ضعیف حضرات کا خاص خیال رکھے۔

آج وزارت داخلہ کی جانب سے لاک ڈاون کی وجہ سے مختلف مقامات پر پھنسے مائگرینٹ ورکرز کی ٹرینوں کے ذریعہ نقل مکانی کے سلسلہ میں اسٹینڈرڈ آپریٹنگ پروٹوکول (ایس او پی) جاری کیا ہے۔

مرکزی معتمد داخلہ اجئے بھلا نے تمام ریاستوں کے چیف سکریٹریز کو لکھا ہے کورونا انفیکشن کا خوف اور معاشی نقصان کے خدشات مختلف ریاستوں میں پھنسے مزدوروں کو آبائی مقام جانے پر مجبور کرنے کے اہم عوامل ہیں۔

انہوں نے مزید لکھا کہ ’مائگرینٹ مزدوروں کی پریشانی کو دور کرنے کےلیے اگر مندرجہ ذیل اقدامات پر عمل درآمد کیا جائے تو میں مشکور رہوں گا‘۔

سکریٹری داخلہ نے تجویز پیش کی کہ ریاستیں اور وزارت ریلوے کے درمیان فعال ہم آہنگی کے ذریعہ مزید خصوصی ٹرینوں کا انتظام کیا جائے اور صفائی، غذا اور طبی سہولیات کا خاص خیال رکھا جائے۔

انہوں نے کہاکہ ضلعی انتظامیہ کی جانب سے سڑکوں پر پیدل چلنے والے مزدوروں کو قریب کے بس یا ریلوے اسٹیشن پہنچانے کے اقدامات کرنا چاہئے تاکہ انہیں ان کے آبائی مقام پہنچایا جاسکے۔

انہوں نے مائیگرینٹ ورکرز کی آسانی سے منتقل کےلیے بسوں کی تعداد میں بھی اضافہ پر زور دیا۔

اجئے بھلا نے کہا کہ مائگرینٹ ورکز کےلیے بین ریاستی سرحدوں کو کھول دیا جانا چاہئے اور منزل تک پہنچنے میں ان کی مدد کرنی چاہئے۔

انہوں نے تمام ریاستوں کے ضلعی حکام کو ہدایت دی کہ وہ اس بات کو یقینی بنائیں کہ کوئی بھی مزدور سڑکوں پر یا ریل کی پٹریوں پر پیدل سفر نہ کریں بلکہ ان انہیں انکے آبائی مقامات تک پہنچانے کےلیے بہتر انتظامات کئے جائیں اس سلسلہ میں ریلوے حکام سے ربط قائم کیا جاسکتا ہے۔