مرکزی حکومت کے ملازمین کو بونس دینے کا اعلان

ملک بھر میں تہوار کے سیزن کا آغاز ہوا ہے ایسے میں مودی حکومت نے ملازمین کو 2019-20 کے لیے بونس دینے کا اعلان کیا ہے۔

مرکزی وزیر پرکاش جاوڈیکر نے آج ایک پریس کانفرنس کو خطاب کرتے ہوئے کابینہ کی جانب سے منظور کئے گئے فیصلوں سے واقف کروایا۔ انہوں نے کہا کہ کابینہ نے مرکزی حکومت کے ملازمین کو بونس دینے کا فیصلہ کیا ہے۔

وزیراعظم نریندر مودی کی صدارت میں منعقدہ کابینی اجلاس کے بعد پرکاش جاوڈیکر نے بتایا کہ مرکزی حکومت کے ملازمین کو بونس دینے کےلیے 3 ہزار 737 کروڑ روپئے منظور کئے گئے۔

مرکزی وزیر پرکاش جاوڈیکر نے بتایا کہ کابینہ کے فیصلہ سے 30 لاکھ سے زیادہ نان گزیٹیڈ ملازمین کو فائدہ ہوگا جس کےلیے 3 ہزار 737 کروڑ روپئے منظور کئے گئے۔ انہوں نے کہا کہ بونس کی رقم ملازمین کو وجئے دشمی سے قبل ایک قسط میں دی جائے گی۔

واضح رہے کہ کورونا وبا کے پیش نظر حکومت کی جانب سے بونس نہ دیئے جانے کے خدشات کا اظہار کیا جارہا تھا۔