کیجریوال نے برطانیہ کی سبھی پروازوں کو معطل کرنے کا مطالبہ کیا

دہلی کے وزیراعلیٰ اروند کیجریوال نے کورونا کی بڑھتی وبا کے پیش نظر مرکزی سرکار سے برطانیہ کی سبھی پروازوں کو معطل کرنے کا مطالبہ کیا ہے۔

برطانیہ میں کورونا کی ایک نئی اور خطرناک قسم کے انکشاف کے بعد دہلی کے وزیر اعلی اروند کیجریوال نے مرکزی سرکار سے یو کے کی سبھی پروازوں کو فوری طور پر معطل کرنے کا مطالبہ کیا ہے۔ انہوں نے اس بارے میں ایک ٹویٹ کر کے جانکاری دی۔

ٹویٹ میں کیجریوال نے لکھا کہ کورونا وائرس کا نیا میوٹیشن برطانیہ میں ابھرا ہے جو ایک سپر اسپریڈر ہے۔ میں مرکزی سرکار سے یو کے کی سبھی پروازوں پر فوری طور پر پابندی لگانے کی اپیل کرتا ہوں۔

واضح رہے کہ برطانیہ میں سامنے آئی کورونا کی ایک نئی قسم نے دنیا بھر کی سرکاروں کی پریشانی میں اضافہ کر دیا ہے۔

برطانیہ میں سامنے آیا کورونا وائرس کا نیا اسٹرین کافی خطرناک بتایا جا رہا ہے۔ اس انکشاف کے بعد یوروپ کے کئی ملکوں نے یو کے جانے والی پروازوں پر پابندی لگا دی ہے۔ اب ہندوستان میں بھی ایسے ہی مطالبات اٹھنے لگے ہیں۔