انٹرویو کے دوران اکشے کمار کی جانب سے پوچھے گئے سوال کہ کیا حزب اختلاف میں آپ کا کوئی دوست ہے تو انہوں نے جواب دیا کہ ہاں کئی سارے دوست ہیں جس میں انہوں نے کانگریس کے سرکردہ رہنما غلام نبی آزاد کا نام لیا تھا۔
دراصل وزیر اعظم نریندر مودی نے ایوان بالا میں آج کانگریس کے سینیئر رہنما غلام نبی آزاد کی آج جم کر ستائش کی، ان کی خوبیوں کا اعتراف کیا اور دو مختلف واقعات کا تذکرہ کیا جب وہ دونوں گجرات اور جموں و کشمیر کے وزیر اعلیٰ تھے۔ موقع تھا راجیہ سبھا سے غلام نبی آزاد کی وداعی کا۔ آج غلام نبی آزاد اپنی مدت کار پوری کرکے راجیہ سبھا کو الوداع کہہ رہے ہیں۔
انٹرویو میں مودی نے اکشے سے کہا تھا کہ 'غلام نبی آزاد اور میں اچھے ساتھی ہیں۔ سال میں ایک دو بار ساتھ میں کھانا بھی کھاتے ہیں'۔
انٹرویو کے دوران مودی نے ایک واقعے کا تذکرہ کیا تھا جب وہ وزیراعظم نہیں تھے۔ ان کا کہنا تھا کہ بہت پہلے میں پارلیمنٹ گیا تھا اور وہاں غلام نبی آزاد اور میں دوستانہ انداز میں بات چیت کرتے ہوئے پارلیمنٹ سے باہر آرہے تھے کہ میڈیا کے نمائندوں نے پوچھا کہ آپ تو آر ایس ایس والے ہیں تو غلام نبی آزاد کے ساتھ آپ کی دوستی کیسے؟