اداکار سنیل شیٹی ایزی اسپٹ مہم کے برانڈ ایمبیسڈر منتخب

بالی ووڈ اداکار سنیل شیٹی کو ایزی اسپٹ (Ezy spit) نامی ایک مہم کا برانڈ ایمبیسڈر مقرر کیا گیا ہے۔ اس اسٹارٹ اپ کا مقصد عوامی مقامات پر تھوکنے کے بڑھتے ہوئے مسئلے کو روکنا ہے۔

ملک کے دارالحکومت دہلی میں بابائے قوم مہاتما گاندھی کے یوم پیدائش کے موقع پر ایزی اسپٹ (Ezy spit) نامی ایک مہم شروع کی گئی ہے، اس مہم کا مقصد صاف ستھرے بھارت کے حوالے سے بیداری پیدا کرنا ہے۔ بالی ووڈ اداکار سنیل شیٹی کو مہم کا برانڈ ایمبیسڈر مقرر کیا گیا۔

اس موقع پر سنیل شیٹی نے بتایا کہ اس اسٹارٹ اپ کا مقصد عوامی مقامات پر تھوکنے کے بڑھتے ہوئے مسئلے کو روکنا ہے۔ انہوں نے بتایا کہ اس مہم کی خاص بات یہ ہے کہ اسے 24 خواتین کی ٹیم نے تیار کیا ہے۔ یہ ایک انقلابی پروڈکٹ ہے، جو جراثیم کے پھیلانے کے خوف کے بغیر آپ کو کہیں بھی تھوکنے کی آزادی دیتی ہے۔

سنیل شیٹی نے بتایا کہ اس مہم کے ذریعے لوگوں میں بیداری لائی جائے گی۔ بیکٹیریا لوگوں کے یہاں اور وہاں تھوکنے سے پھیلتا ہے، جس کی وجہ سے بیماری پھیلنے کا زیادہ خطرہ ہوتا ہے۔ حکومت مسلسل لوگوں کو آگاہ کر رہی ہے، لیکن لوگوں کے لیے خود سے آگاہ ہونا ضروری ہے۔

واضح رہے کہ صاف ستھرا بھارت کے لیے ایزی اسپٹ نامی مہم ملک بھر میں شروع کی گئی ہے لیکن اس کی شروعات قومی دارالحکومت دہلی سے ہوئی ہے اور اب سنیل شیٹی کو برانڈ ایمبسیڈر بنانے سے اس مہم میں مزید تقویت مل سکتی ہے۔

واضح رہے کہ یہ مہم انسانی تھوک کے فضلے سے پودے اگانے کے خیال سے بنائی گئی ہے۔ 5 روپئے کا ایک پاؤچ کئی بار تھوکنے کے لیے مفید ہوگا۔ پھر جہاں آپ اسے پھینکیں گے وہاں پودا اگ جائے گا۔