Raghav Suspended from RS سنجے سنگھ کے بعد عآپ کے ایک اور رکن پارلیمنٹ راگھو چڈھا راجیہ سبھا سے معطل

عام آدمی پارٹی کے رکن راگھو چڈھا کو نامناسب برتاؤ کے الزام میں کمیٹی آف پریویلیجز کی رپورٹ آنے تک راجیہ سبھا سے معطل کر دیا گیا ہے۔ اس سے قبل عآپ ہی کے ایک اور ایم پی سنجے سنگھ کو بھی راجیہ سبھا سے معطل کیا جاچکا ہے۔

نئی دہلی: عام آدمی پارٹی کے رکن پارلیمنٹ راگھو چڈھا کو چیئرمین جگدیپ دھنکھر کے نامناسب رویے کے لیے راجیہ سبھا سے معطل کر دیا ہے۔ راگھو چڈھا کمیٹی آف پریویلیجز کی رپورٹ آنے تک راجیہ سبھا سے معطل رہیں گے۔ عام آدمی پارٹی کے ایک اور ایم پی سنجے سنگھ کی معطلی کو بھی اس وقت تک بڑھا دیا گیا جب تک کہ کمیٹی آف پریویلیجز ان کے خلاف شکایات پر فیصلہ نہیں کرتی۔

راگھو چڈھا کی معطلی کی قرارداد ایوان کے قائد پیوش گوئل کی طرف سے پیش کی گئی تھی اور اس قرار داد کو صوتی ووٹ سے منظور کر لیا گیا۔ پیوش گوئل نے راگھو چڈھا پر نامناسب برتاؤ کا الزام لگایا تھا۔ پیوش گوئل نے کہا کہ راگھو چڈھا کا بحیثیت رکن پارلیمنٹ ایوان میں رویہ نامناسب رہا ہے۔ ایوان کے فلور پر ان کا طرز عمل ایوان کی کاروائی میں خلل کا باعث بنا جو کی سنگین خلاف ورزی ہے۔ ان کی حرکتیں ناگوار اور نامناسب تھیں اور میرے لیے قرارداد کو پیش کرنا تکلیف دہ ہے لیکن میں ایسا کرنے کا پابند بھی ہوں۔

واضح رہے کہ گزشتہ روز کانگریس لیڈر ادھیر رنجن چودھری کو لوک سبھا سے معطل کر دیا گیا تھا۔ لوک سبھا لیڈر پرہلاد جوشی نے ادھیر رنجن کی معطلی کی تجویز پیش کی تھی جسے پارلیمنٹ نے قبول کر لیا۔ پرہلاد جوشی نے ادھیر رنجن چودھری پر پارلیمانی کارروائی کے دوران مسلسل رکاوٹیں پیدا کرنے اور یہاں تک کہ ملک اور اس کی شبیہ کو بدنام کرنے کا الزام لگایا۔ انہوں نے کہا کہ یہ ان کی عادت بن گئی ہے۔ بار بار وارننگ ملنے پر بھی اس نے اپنی اصلاح نہیں کی۔ وہ ہمیشہ اپنی بحثوں میں بے بنیاد الزامات لگاتے ہیں۔ وہ ملک اور اس کی شبیہ کو خراب کرتے ہیں اور کبھی معافی نہیں مانگتے۔