نمستے گینگ کا سرغنہ گرفتار

پولیس کے مطابق نمستے گینگ کا رکن اقرار احمد لوٹ مار اور چین اسنیچنگ کے دو درجن سے زیادہ مجرمانہ معاملات میں ملوث رہا ہے۔

دہلی پولیس کے اسپیشل سیل نے 'نمستے گینگ' کے رکن اور مہاراشٹر کنٹرول آف آرگنازئزڈ کرائم ایکٹ (ایم سی او سی اے ) کے تحت الزامات کا سامنا کر رہے بدمعاش اقرار احمد کو ہفتے کی صبح گرفتار کرلیا۔

پولیس ذرائع نے بتایا کہ اقرار کو تیس ہزاری عدالت کے قریب گرفتار کیا گیا۔ اقرار (36) دہلی کے نیو مصطفیٰ آباد کا رہنے والا ہے۔ پولیس نے اس سے ایک پستول اور چار کارتوس بھی برآمد کیا ہے۔

اقرار بدنام زمانہ 'نمستے گینگ' کا رکن ہے اور ایم سی او سی اے معاملہ میں مطلوب ہے۔ وہ قومی دارالحکومت میں لوٹ کے بہت سے معاملات میں پولیس کو مطلوب تھا۔ وہ سال 2017 میں ایک پولیس اہلکار پر قاتلانہ معاملے میں بھی شامل تھا۔

پولیس نے بتایا کہ وہ اس سے پہلے لوٹ مار اور چین اسنیچنگ کے دو درجن سے زیادہ مجرمانہ معاملوں میں ملوث رہا ہے۔