نئی دہلی: ڈی ایم آفس میں تعینات آٹھ ملازمین کورونا پازیٹیو

قومی دارالحکومت دہلی کے ضلع نئی دہلی میں ڈی ایم آفس میں تعینات 8 ملازمین کورونا سے متاثر پائے گئے ہیں۔ جس کے بعد ڈی ایم آفس کو سیل کر دیا گیا ہے۔ انتظامیہ کی جانب سے ملازمین کو اگلے احکامات تک گھر سے کام کرنے کی ہدایت کی گئی ہے۔

نئی دہلی کے ڈی ایم آفس کے ایک سینئر عہدیدار نے بتایا کہ ڈی ایم آفس میں واقع 12 نمبر والے کمرے میں بیٹھنے والے کچھ ملازمین، عملہ اور سول ڈیفنس رضاکار کورونا مثبت پائے گئے ہیں۔ یہ تمام ملازمین افسران کے دفاتر میں فائلوں اور دستاویزات پر دستخط کرانے جیسے کام کرتے تھے۔ اب ان افراد میں کورونا مثبت ہونے کے بعد افسران کی تشویش بھی بڑھ گئی ہے۔

اہلکار کا مزید کہنا ہے کہ تمام آٹھ ملازمین جنہیں کورونا متاثر پایا گیا ہے، ان سبھی کو جے سنگھ روڈ پر واقع وائی ایم سی اے ہیڈکوارٹر میں قائم قرنطینہ مرکز میں داخل کرایا گیا ہے، جہاں ان کا علاج چل رہا ہے۔

ڈی ایم آفس کے ایک اہلکار نے بتایا کہ کورونا کے 8 کیسز موصول ہونے کے بعد ڈی ایم آفس کو سیل کر دیا گیا ہے اور پورے آفس کو سینیٹائز کیا جا رہا ہے۔ ہمیں امید ہے کہ اس ہفتے کے آخر تک یا پیر کو یہ آفس دوبارہ کھولا جاسکتا ہے۔