دہلی میں 350 روپے کے لیے 18 سالہ لڑکے کا قتل، ملزم نابالغ نکلا

منگل کو ویلکم علاقہ میں ایک نابالغ نے صرف 350 روپے کے لیے 18 سالہ لڑکے کو قتل کر دیا۔ مقتول کی شناخت نہیں ہوسکی ہے۔ پولیس نے واقعے کے فوری بعد ملزم کو گرفتار کرلیا۔ Murder for Rs 350 in Delhi

نئی دہلی: مشرقی دہلی کے ویلکم علاقے میں ڈکیتی کے دوران قتل کا معاملہ سامنے آیا ہے۔ یہ واقعہ گزشتہ منگل کو پیش آیا۔ جہاں ایک 18 سالہ نوجوان کو صرف 350 روپے کے لیے قتل کر دیا گیا۔ قتل کا ملزم 16 سالہ نابالغ ہے۔ واقعہ کی اطلاع ملتے ہی پولیس موقع پر پہنچ گئی اور لاش کو قبضے میں لے کر پوسٹ مارٹم کے لیے جی ٹی بی اسپتال بھیج دیا۔ مقتول کی شناخت نہیں ہوسکی ہے۔ پولیس نے واقعے کے چند گھنٹے بعد ہی ملزم کو گرفتار کرلیا۔ ملزم سے واردات میں استعمال ہونے والا چاقو بھی برآمد کر لیا گیا ہے۔

نارتھ ایسٹ دہلی کے ڈی سی پی ڈاکٹر جوئے ٹرکی نے اس معاملے پر کہا کہ، ’’منگل کی رات تقریباً 11:15 بجے اطلاع ملی کہ گلی نمبر 18 عیدگاہ روڈ پر ایک 18 سالہ نوجوان کو چاقو سے مار ہلاک کیا گیا ہے۔ جنتا مزدور کالونی، ویلکم تھانے کے علاقے میں اطلاع ملتے ہی پولیس کی ٹیم موقع پر پہنچی، خون میں لت پت لڑکے کو اسپتال لے جایا گیا، جہاں ڈاکٹر نے اسے مردہ قرار دے دیا۔ ڈی سی پی نے بتایا کہ قتل کا مقدمہ درج کرکے تحقیقات شروع کردی گئی ہے۔ جائے وقوعہ پر نصب سی سی ٹی وی فوٹیج کی بنیاد پر ملزم نابالغ کی شناخت کر کے اسے پکڑ لیا گیا۔ دوران تفتیش ملزم نے بتایا کہ اس نے نوجوان کو ڈکیتی کی نیت سے قتل کیا ہے۔ ملزم نے پہلے مقتول کا گلا دبایا، جب مقتول بے ہوش ہوا تو اس پر وار کرکے اس کی جیب سے 350 روپے لوٹ لئے۔

قابل ذکر ہے کہ راجدھانی دہلی میں شرپسندوں کے حوصلے بلند ہیں۔ وہ چوری، چھینا جھپٹی اور قتل جیسے جرائم کرنے سے باز نہیں آ رہے۔ دو دن پہلے بھی باہری دہلی کے مغربی وہار تھانہ علاقے میں ایک نوجوان کو ڈکیتی کے خلاف احتجاج کرنے پر چاقو مار کر ہلاک کر دیا گیا تھا۔ ملزم تاحال پولیس کی گرفت سے باہر ہے۔