پنجاب میں کورونا کے 122 نئے کیسز

پنجاب میں کورونا وائرس سے متاثر ایک مریض کی آج موت ہونے سے ریاست میں کووِڈ۔19 وبا سے ہلاک ہونے والوں کی تعداد جہاں 99 ہوگئی۔ وہیں کورونا مثبت کے 122 نئے کیسز سامنے آئے ہیں۔

پنجاب حکومت کی جانب سے شام کو جاری بلیٹن کے مطابق فیروز پور میں ایک مریض ہلاک ہوگیا ہے۔ اس کے ساتھ ہی 122 نئے کیسز سامنے آئے ہیں۔ ان میں سب سے زیادہ 54 لدھیانہ سے ہیں۔ پٹھان کوٹ میں بھی 16 افراد کورونا متاثر پائے گئے ہیں۔

بلیٹن کے مطابق کورونا کے 22 مریضوں کے آج صحتیاب ہو جانے کے بعد انھیں اسپتالوں سے چھٹی دے دی گئی ہے۔ ان میں 12 موہالی سے پٹھان کوٹ سے چھ اور گرداس پور سے چار افراد شامل ہیں۔

ریاست میں وبا شروع ہونے سے اب تک کورونا متاثرین کی تعداد 4074 ہو چکی ہے جن میں سے 2700 مریضوں کو چھٹی دی جا چکی ہے اور اس وقت ایکٹیو کیسز یعنی زیر علاج مریضوں کی تعداد 1275 ہے۔