چھتیس گڑھ: ماؤنوازوں کی پٹائی سے 25 افراد زخمی

دنتے واڑہ کے ایس پی ابھیشیک پالو نے کہا کہ گاؤں والوں نے دو دن قبل انتظامیہ سے ماؤنوازوں کے مظالم کی شکایت کی تھی۔ یہ خبر غالباً ماؤنوازوں تک جاپہنچی جس سے وہ مشتعل ہوکر گاؤں پہنچے اور 25 مقامی لوگوں کو باندھ کر پیٹا۔

چھتیس گڑھ کے ضلع دنتے واڑہ کے کٹیکلیان تحصیل میں ماؤ نوازوں نے ایک نوزائیدہ بچے کی ماں سمیت 25 مقامی افراد کی بڑی بے دردی سے پٹائی کی۔

پولیس کے مطابق یہ واقعہ اس وقت پیش آیا جب اس علاقہ کے لوگوں نے ضلع کلکٹر اور پولیس سپرنٹنڈنٹ ابھیشیک پالو سے ان کے دورے کے دوران بات کی۔ مقامی لوگوں نے انہیں اپنی پریشانیوں سے آگاہ کیا اور اس خطے میں ترقیاتی کاموں کو انجام دینے کا مطالبہ کیا۔ انہوں نے ماؤنوازوں کے مظالم کی روداد بھی سنائی۔

دنتے واڑہ کے ایس پی ابھیشیک پالو نے کہا کہ گاؤں والوں نے نکسلیوں کو مشتعل کردیا جب انہوں نے دو دن قبل انتظامیہ سے بات کی تھی۔ اس کے بعد انہوں نے اتوار کے روز 25 لوگوں کو باندھ کر پیٹا۔

ماؤ نوازوں کے مظالم سے خوفزدہ ہوکر گاؤں والوں نے واقعے کے بعد انتظامیہ کے پاس جانے سے گریز کیا۔ کٹیکلیان اسٹیشن سے پولیس کی ایک ٹیم گاؤں پہنچی اور اس معاملے سے متعلق جانکاری حاصل کی۔

اس کے بعد ایس پی پالو نے 18 زخمیوں کو کٹیکلیان اسپتال لے جانے کے لیے چار ایمبولینسیز بھجوائیں جبکہ 7 شدید زخمیوں کو ڈسٹرکٹ اسپتال منتقل کر دیا گیا۔

ایس پی ابھیشیک پالو نے کہا کہ ' 18 افراد کو علاج کے بعد کٹیکلیان اسپتال سے فارغ کردیا گیا جبکہ دیگر افراد ابھی بھی زیر علاج ہیں۔ ہم ماؤنوازوں کے خلاف کاروائی کر رہے ہیں'۔