بڈگام: مستحق افراد میں راشن کٹس کی تقسیم

عالمی وبا کورونا وائرس کے پھیلاؤ کو روکنے کے لیے عائد لاک ڈاؤن سے جہاں تجارتی سرگرمیاں ٹھپ رہیں وہیں، لاک ڈاؤن کے سبب غریب عوام کو اس مشکل وقت میں کافی دقتوں کا سامنا کرنا پڑا۔

وبائی مرض کے دوران عائد لاک ڈائون کے سبب جہاں بیشتر لوگ اپنے گھروں تک ہی محدود ہو کر رہ گئے۔ جو لوگ یومیہ طور پر کماتے اور کھاتے تھے، ان کے کھانے کے لالے پڑ گیے ہیں۔

ایسے افراد کی امداد کے لیے انتظامیہ، فوج اور دیگر سرکاری محکموں کے علاوہ غیر سرکاری تنظیمیں اور فلاحی ادارے ضرورتمندوں کی مدد کے لیے آگے آ رہی ہیں۔

اسی کڑی کے تحت بدھ کو وسطی کشمیر میں ضلع بڈگام کے سوئبگ علاقے میں ضلع انتظامیہ نے انڈین آرمی کے اشتراک سے متعدد ضرورت مندوں میں راشن کٹس تقسیم کیے۔

بی ڈی او بڈگام امن دیپ سنگھ نے ای ٹی وی بھارت کو تفصیلات فراہم کرتے ہوئے کہا کہ ’’اس مہم کا مقصد غریبوں اور حاجت مندوں کی امداد کرنا ہے، تاکہ کوئی بھی باشندہ بھک مری کا شکار نہ ہو۔‘‘

انہوں نے کہا کہ ’’آج ہم نے سوئبگ علاقے میں قریب 30 ضرورت مندوں کی نشاندہی کر کے انہیں راشن کٹس فراہم کیے۔‘‘

بی ڈی او بڈگام نے کہا کہ اس طرح کی امداد مستقل میں بھی جاری رہے گی۔